POLŞA PREZİDENTİ “HEYDƏR ƏLİYEV” ORDENİ İLƏ TƏLTİF EDİLMİŞDİR
Bakı, 2 iyul (AZƏRTAC). İyulun 2-də sənədlərin imzalanma mərasimindən sonra Polşa Prezidenti Lex Kaçinskinin təltif etmə mərasimi olmuşdur.
Polşa ilə Azərbaycan arasında dostluq və əməkdaşlıq əlaqələrinin inkişaf etdirilməsindəki xüsusi xidmətlərinə görə Polşa Respublikasının Prezidenti Lex Kaçinskinin ölkəmizin ali mükafatı olan “Heydər Əliyev” ordeni ilə təltif edilməsi haqqında Azərbaycan Respublikası Prezidentinin Sərəncamı oxundu.
Azərbaycan Prezidenti İlham ƏLİYEV Polşa Prezidenti Lex Kaçinskini təbrik edərək dedi:
-Hörmətli Cənab Prezident, mən Sizi Azərbaycan dövlətinin ən ali mükafatı - “Heydər Əliyev” ordeni ilə məmnuniyyətlə təltif edirəm.
Siz Azərbaycan xalqının yaxın dostusunuz və Polşa-Azərbaycan ikitərəfli əlaqələrinin inkişafında Sizin xüsusi xidmətləriniz vardır. Sizin önəmli təşəbbüsləriniz Polşa ilə Azərbaycan arasında energetika sahəsində və geniş mənada Avropada enerji məsələlərinin həlli işində çox mühüm rol oynamışdır. Son üç il ərzində bu, Sizin Azərbaycana beşinci səfərinizdir. Bu, iki ölkə arasında çox güclü əlaqələrin bariz nümunəsidir.
Ermənistan-Azərbaycan, Dağlıq Qarabağ münaqişəsinin Azərbaycanın ərazi bütövlüyü çərçivəsində həll olunması prinsiplərini Siz həmişə müdafiə edirsiniz və bütün Azərbaycan xalqı buna görə Sizə minnətdardır.
Sizə möhkəm can sağlığı və gələcək fəaliyyətinizdə yeni uğurlar arzu edirəm.
İndi isə icazə verin bu yüksək mükafatı Sizə təqdim edim.
Azərbaycan Prezidenti İlham Əliyev ordeni Polşa Prezidenti Lex Kaçinskiyə təqdim etdi.
Polşa Prezidenti Lex KAÇİNSKİ təşəkkür edərək dedi:
-Cənab Prezident!
Bu ordeni Sizin tərəfdən qəbul etməkdən şərəf hissi duyuram. Çünki bu orden Azərbaycanın müstəqilliyinin rəmzidir. Bu elə bir müstəqillikdir ki, Sizin ölkəniz də, bizim ölkəmiz də müstəqilliyi eyni zaman kəsiyində qazanmışdır. Məhz bu elə bir müstəqillik idi ki, qəti surətdə və prinsipial qaydada həm Azərbaycan, həm də Polşa xalqlarının həyatında çox böyük, ciddi dəyişikliklərə səbəb oldu. Mən uzun müddət siyasətlə məşğul olmuşam. Daha sonra isə öz ölkəmin prezidenti seçildim və qarşıda duran əsas vəzifələrdən biri 18 il əvvəl müstəqilliyini qazanmış, müstəqil inkişaf yoluna qədəm qoymuş ölkələrlə münasibətlərin qurulmasından ibarət idi. Bu, həmçinin Azərbaycan və Polşanın maraqlarını anlayan tərəflərin, dairələrin də uğuru idi. Eyni zamanda, vacib məsələ ondan ibarətdir ki, həm böyük, həm kiçik xalqların muxtariyyətə və müstəqilliyə tam hüquqları vardır.
İcazə verin, Dağlıq Qarabağ məsələsi barədə bir-iki söz deyim. Bu məsələ ilə bağlı şəxsən məndə heç bir şəkk-şübhə yoxdur. Güc tətbiq etməklə hər hansı bir ölkənin ərazi bütövlüyünün pozulması qəbuledilməzdir. Heç kəs hətta ən güclü bir himayədarın bayrağı altında hərəkət etməli deyil. Mən bilirəm ki, elə bu məsələdə işlər məhz belə də baş verdi. Mən təbii ki, bu problemin sülh yolu ilə nizamlanmasının tərəfdarıyam. Lakin əslinə qalsa bu məsələnin həlli məhz bir formada olmalıdır. Azlıqların hüququnun qorunmasına əməl olunmalı, lakin Azərbaycanın ərazi bütövlüyünün saxlanması, bərpası təmin edilməlidir.
Bir daha Sizə minnətdaram.
######
 |
 |
 |
Bölmənin digər xəbərləri
