DÜNYA
Praqa Ukraynanın NATO-ya üzvlüyünü dəstəkləyir
Praqa, 7 iyul, AZƏRTAC
Çex Respublikasının Prezidenti Petr Pavel hesab edir ki, müharibənin başa çatmasından sonra Ukrayna Şimali Atlantika İttifaqına üzvlüyü barədə danışıqlara başlamalıdır.
AZƏRTAC xəbər verir ki, bu barədə Petr Pavel Ukrayna Prezidenti Volodimir Zelenskinin Çexiyaya səfəri zamanı Ukrayna liderinə deyib. Çexiya Prezidentinin sözlərinə görə, onun ölkəsi Ukraynaya 1,87 milyard avro dəyərində yardım edib. “Ukraynanın həm müharibədən sonra, həm də müharibə vaxtı bərpası Çexiya və çex şirkətləri üçün yaxşı fürsət kimi qiymətləndirilməlidir”, - deyə o, Zelenski ilə danışıqların nəticələrinə dair mətbuat konfransında bildirib.
“Ukraynanın müharibədən sonra NATO-ya üzvlüyü ilə bağlı danışıqlara başlaması Çexiyanın maraqlarına uyğundur. Bu həm də təhlükəsizliyimiz, regional sabitlik və iqtisadi rifahımız nöqteyi-nəzərindən maraqlarımıza cavab verir. Çexiya Ukraynanın Avropa İttifaqına üzvlüyü ilə bağlı danışıqların bu ilin sonuna qədər başlaması üçün çalışacaq” , — deyə Petr Pavel qeyd edib.
Vüqar Seyidov
AZƏRTAC-ın xüsusi müxbiri
Praqa