Prezident İlham Əliyev dindarlara kömək və dəstək göstərilməsinə böyük diqqət yetirir
Bakı, 1 dekabr, AZƏRTAC
Yəhudi Xəbərlər Agentliyi (YXA) öz saytında “Dini icmalara dövlət yardımı” sərlövhəli məqalə yerləşdirib.
Məqalə Azərbaycan Respublikasının Prezidenti İlham Əliyevin “Azərbaycanda dini icmalara maliyyə yardımı göstərilməsi haqqında” 2014-cü il 27 noyabr tarixli Sərəncamına həsr edilib.
Məqalədə deyilir ki, Azərbaycan Prezidenti İlham Əliyev 2015-ci ildə ölkənin müxtəlif dini icmalarına 2,5 milyon manat (3 milyon dollardan çox) maliyyə yardımı ayrılması haqqında Sərəncam imzalayıb.
Bu vəsait Dini Qurumlarla İş üzrə Dövlət Komitəsinin (DQİDK) hesabına köçürüləcək. Dövlətin maliyyə yardımının respublikanın dini icmaları arasında bölüşdürülməsi ilə bu qurum məşğul olacaq.
DQİDK-dən Yəhudi Xəbərlər Agentliyinə deyiblər: “Azərbaycanda rəsmən 600-dək dini icma - müsəlman, yəhudi, xristian və s. icmalar qeydə alınıb və fəaliyyət göstərir. 2015-ci ildə bütün bu dini birliklər dövlətdən proporsional maliyyə yardımı alacaqlar. Dövlətin yardımı həm də dini maarifləndirmənin gücləndirilməsinə, milli mənəvi dəyərlərin möhkəmlənməsinə yönələn layihələrin dəstəklənməsinə sərf olunacaq”.
Qırmızı qəsəbə Dağ yəhudiləri dini icmasının sədri Boris Simanduyev YXA-ya müsahibəsində deyib: “Möhtərəm Prezidentimiz İlham Əliyevin 2015-ci ildə respublikanın dini icmalarına 2,5 milyon manat vəsaitin ayrılması barədə Sərəncamı parlaq şəkildə təsdiq edir ki, dövlətimizin başçısı dindarlara yardım və dəstək göstərilməsinə böyük diqqət ayırır.
Biz, Azərbaycan yəhudiləri bu dəstəyə görə Prezident İlham Əliyevə səmimi qəlbdən minnətdarıq. Dövlət Azərbaycanın digər yəhudi icmaları, müsəlman və xristian icmaları ilə bərabər, bizim dini icmaya da hərtərəfli kömək, o cümlədən maliyyə yardımı göstərir.
Bu hadisə icmamızın üzvlərinin dini tərbiyə, maarifləndirmə, müqəddəs Tövratın ayələrində göstərilən işlərə böyük diqqət yetirmələrinə imkan verir”.
Bölmənin digər xəbərləri
