Prezident İlham Əliyev “Euronews”a müsahibəsində Azərbaycanın konseptual baxışını ortaya qoydu - Şərh
Bakı, 5 avqust, AZƏRTAC
Prezident İlham Əliyevin Şuşada “Euronews” televiziyasına müsahibəsi region ölkələri, xüsusilə də Azərbaycanla Ermənistan arasında münasibətlərin normallaşması və inkişaf etdirilməsi, Qarabağın erməni icmasının reinteqrasiyası, kənar güclərin bölgədə sülh və sabitliyə kobud müdaxiləsinə qarşı rəsmi Bakının konseptual baxışının ortaya qoyulması baxımından xüsusi önəm daşıyır. Dövlətimizin başçısı dünyanın 160 ölkəsində yayımlanan və 400 milyonluq auditoriyası olan bir platformada həm Azərbaycanın yol xəritəsini bəyan etdi, həm də ölkənin maraqlarına xidmət edən qətiyyət, prinsipiallıq sərgilədi.
Bu fikirləri AZƏRTAC-a açıqlamasında politoloq Ramiz Alıyev söyləyib.
Müsahibənin Azərbaycanın mədəniyyət paytaxtı olan Şuşada verilməsinin ciddi siyasi məna kəsb etdiyini vurğulayan politoloq bildirib: “Müsahibədə dövlətimizin başçısı manipulyasiyalarla məşğul olan qüvvələrə, “sülh”, “insan hüquqları” adı altında bölgədə gərginlik yaratmaq istəyənlərə açıq mesajlar verdi. dedi ki, sülh prosesini ləngidən tərəflərin bəlli olduğu halda kimlərinsə Azərbaycanı qınaması, təzyiqlər göstərməsi anlaşılan deyil. Azərbaycan atdığı addımlarla, irəli sürdüyü təkliflərlə sülh prosesində maraqlı olduğunu dünyaya sübut edib. Biz bütün sağlam təkliflərə açığıq. Rusiya, yaxud Qərbin vasitəçilik təkliflərindən heç zaman imtina etməmişik. Amma, eyni zamanda, Azərbaycan Prezidenti ölkəmizə qarşı qərəzli münasibətlərə, ikili yanaşmalara da toxundu. Bildirdi ki, Ukrayna və Gürcüstanda separatizmlə mübarizədə Qərbin sərgilədiyi ardıcıl, prinsipial mövqeyi biz Azərbaycana münasibətdə görmürük. Eyni mənşədən olan separatizmə son qoymaq üçün Azərbaycanın legitim istəyi isə sual altına alınır. Avropa dövlətləri gərək “Euronews”un 250 milyonluq tamaşaçısı önündə bu riyakar siyasətlərinə aydınlıq gətirsinlər. Prezident İlham Əliyev, həmçinin telekanalın Laçın yolundakı vəziyyətə dair sualına da aydınlıq gətirdi. Diqqətə çatdırdı ki, “Laçın” dövlət sərhədindən buraxılış məntəqəsini qurduğumuz vaxtdan etibarən Qarabağın 2 mindən artıq sakini asan şəkildə bu yoldan istifadə edib. İyunun 15-də Ermənistanın hərbi təxribatı araşdırılan zaman yol müvəqqəti bağlansa da, sonradan açılıb və Beynəlxalq Qırmızı Xaç Komitəsi (BQXK) də humanitar məqsədlərlə yoldan istifadə edir. Bu da BQXK-da o qədər özgüvən formalaşdırıb ki, onlar artıq qaçaqmalçılıq, beynəlxalq axtarışda olan şəxslərin proteksiya edilərək məsuliyyətdən yayındırılması kimi birbaşa cinayətkar qəsdlərə əl atırlar.
Prezident İlham Əliyev müsahibədə Azərbaycanın legitim tələbini bir daha dilə gətirməklə Beynəlxalq Qırmızı Xaç Komitəsini ifşa etdi. Bildirdi ki, BQXK Qarabağdakı ofisinin Bakı ofisinə yox, İrəvandakı ofisə tabe olması yolverilməzdir. Azərbaycanın bu vəziyyətlə barışmaq niyyətində olmadığını diqqətə çatdıran Prezident İlham Əliyev çıxışı ilə BQXK-nın Xankəndidəki təmsilçiliyinin ya Bakı ofisinə tabe olmasını, ya da bütövlükdə Azərbaycandakı fəaliyyətinə son qoyulacağı xəbərdarlığını etdi”.
R.Alıyev onu da qeyd edib ki, Azərbaycan Prezidenti “Euronews”un vasitəsilə qalib Lider kimi Qarabağın erməni sakinlərinə və Ermənistan əhalisinə çağırış etdi. Bildirdi ki, Qarabağdakı ermənilər ölkəmizdəki digər çoxsaylı milli azlıqlar kimi Azərbaycan vətəndaşları olaraq yaşayacaqlarına, yoxsa Azərbaycanı tərk edəcəklərinə dair seçim etməlidirlər. Onlar qondarma ölkədə yaşayırlarmış kimi davransalar, bu gün olduqları vəziyyət onların xeyrinə dəyişməyəcək. Ermənistan isə hazırkı geosiyasi vəziyyəti və qüvvələr balansını aydın dərk etməlidir. Onların Azərbaycanla sülh müqaviləsi bağlamaqdan başqa çıxış yolu yoxdur. Digər variantlar Ermənistana çox ağır başa gələcək. 44 günlük Vətən müharibəsində məğlub olan Ermənistanın atacağı qanunsuz addımların qarşısı daha sərt formada alınacaq. Prezident İlham Əliyev ermənilərə daha da pis vəziyyətə düşməmək üçün 5 bəndlik sülh müqaviləsi təklifi edib. Bütün hallarda dövlətimizin başçısının Şuşada “Euronews”a müsahibəsi Azərbaycanın bölgədə sülh və sabitliyin bərqərar olmasına dair baxışlarını çox aydın şəkildə ortaya qoymaqla yanaşı, prosesə mane olmağa çalışan qüvvələrə də ciddi mesajlarla zəngin idi.
Bölmənin digər xəbərləri
