Prezidentin “Euronews”a müsahibəsində səsləndirdiyi fikirlər Azərbaycanın siyasətində müstəqil olduğunu bir daha təsdiqlədi - Deputat
Bakı, 4 avqust, AZƏRTAC
Prezident İlham Əliyevin hər bir müsahibəsi, çıxışı Azərbaycan reallıqlarının dünya ictimaiyyətinə çatdırılmasında zəngin mənbədir. Bu baxımdan dövlətimizin başçısının “Euronews” televiziyasına müsahibəsi hazırda ölkə və dünya mətbuatında geniş müzakirə olunmaqdadır. Prezident İlham Əliyev müsahibəsində diqqəti postmünaqişə dövrünün reallıqları fonunda əsas çağırış olan sülh müqaviləsinin imzalanmasını şərtləndirən amillərə yönəltdi. Bildirdi ki, İkinci Qarabağ müharibəsindən sonra sülhün yaradılması üçün beynəlxalq iştirakçılar heç bir iş görməyiblər.
Azərbaycan 30 illik işğal dövründə də eyni vəziyyəti yaşamışdı. Hazırda arxivə atılan ATƏT-in Minsk qrupu münaqişənin həllində vasitəçilik missiyasını yerinə yetirmək məqsədilə yaradılsa da, 28 ildə missiyasının nədən ibarət olduğunu dərk etmək istəmədi. Bu qurum Ermənistanın danışıqlara imitasiya naminə qatılmasına dəstək olmaqla münaqişənin nizamlanması prosesinin uzanmasına, işğalçı dövlətin iddialarının daha da dərinləşərək yeni ərazilər uğrunda müharibə planları hazırlaması üçün vaxt qazanmasına səbəb oldu. Diqqətçəkən digər məqam isə postmünaqişə dövründə əksər dünya güclərinin Azərbaycanın Ermənistana təklif etdiyi sülh müqaviləsini dəstəkləyərək, bu istiqamətdə səylər göstərməsi, ən əsası Qarabağın Azərbaycan ərazisi olduğunu bildirmələridir. Bu reallıqlar işğal dövründə qeyd edilsəydi, qətnamələr kağız üzərində saralmasaydı, İkinci Qarabağ müharibəsi yaşanmazdı.
Bu fikirləri AZƏRTAC-a Milli Məclisin deputatı Malik Həsənov bildirib.
M.Həsənov vurğulayıb ki, Prezident İlham Əliyev sözügedən müsahibəsində Azərbaycanın bölgədə dayanıqlı sülhün və təhlükəsizliyin təmin edilməsi, Ermənistanla münasibətlərində yeni səhifənin açılması məqsədilə təklif etdiyi sülh müqaviləsindən danışdı, dünya ictimaiyyətinin diqqətini bu məqama yönəltdi. Bildirdi ki, Azərbaycan 30 illik işğaldan əziyyət çəkmiş və ədaləti güc hesabına bərpa etmiş ölkə olaraq yeni sülh prosesinin müəllifidir. Hər şey çox rəvan getməsə də, hələ də nikbinik. Sülh müqaviləsinin imzalanması ilə bağlı müxtəlif formatlarda və tərkiblərdə keçirilən görüşlər çox həssas məsələlərə toxunmaq imkanı verir. Sərhədlərin gələcək parametrləri - Ermənistanla Azərbaycan arasında sərhəd müəyyən olunmayıb. Belə bir əminlik də ifadə edildi ki, əgər Azərbaycan Ermənistan tərəfindən konstruktiv yanaşma görsə, əgər ermənilər ölkəmizin ərazi bütövlüyünü mübahisələndirən bütün iddialarını kənara qoysalar, onda tezliklə, bəlkə də ilin sonunadək sülh variantı tapıla bilər.
Deputat diqqəti hazırda Laçın yolundakı vəziyyətə yönəldərək bildirib ki, Ermənistan ənənəsinə uyğun olaraq əsassız fikirləri ilə dünyanın diqqətini yayındırmağa, sülh müqaviləsinin imzalanması prosesinin uzadılmasına çalışdığını aydın şəkildə büruzə verir. “Dövlətimizin başçısı mövcud vəziyyəti bir daha əsaslı şəkildə diqqətə çatdıraraq dedi ki, həmin yoldan hərəkət azadlığı bloklanmayıb. Aprelin 23-dən, yəni sərhəd məntəqəsinin qurulduğu vaxtdan Qarabağın 2 mindən çox sakini Ermənistana asan şəkildə gedib-gəlib. İyunun 15-də Ermənistan növbəti təxribata əl ataraq sərhədçilərimizdən birini yaralayıb. Araşdırma aparıldığı üçün yol müvəqqəti olaraq bağlansa da, sonra təkrar açılıb”, - deyə deputat vurğulayıb ki, Ermənistan hər vəchlə sülh müqaviləsinin imzalanması prosesinin uzanmasına çalışır. İşğalçı dövlətə bu gün də dəstəyin davam etdirilməsi dünyada etimadsızlıq mühitini daha da dərinləşdirir.
M.Həsənov diqqəti dövlətimizin başçısının Ermənistandakı və Qarabağdakı ermənilərə mesajlarına da yönəldib. Deyib ki, Prezident İlham Əliyevin hər bir çağırışı, mesajı gələcəklə bağlı aydın təsəvvür yaradır. “Sözügedən müsahibə bir daha Azərbaycanın siyasətində müstəqil olduğunu, xarici siyasətinin prinsiplərinin dəyişməzliyini təsdiqlədi. Prezident İlham Əliyev bütün məsələlərə Azərbaycanın ədalətə və beynəlxalq hüquqa əsaslanan mövqeyi baxımından münasibət bildirməklə əlaqələrin inkişafında bu prinsiplərin rolunu və əhəmiyyətini açıqladı. Bir daha bəyan edildi ki, Ermənistana qarşı hər hansı bir ərazi iddiamız yoxdur. Onların da Azərbaycana qarşı ərazi iddiaları olmamalıdır”, - deyə deputat fikirlərini yekunlaşdırıb.
Bölmənin digər xəbərləri
