Qabonlu doktorant: Ölkəm uzun illər Fransa müstəmləkəçiliyinə məruz qalıb
Bakı, 20 may, AZƏRTAC
“Dekolonizasiya prosesində gənclərin şəhərsalmada rolu” mövzusunda keçirilən beynəlxalq konfransın şəhərlərin inkişafında texnologiyanın əhəmiyyətinə həsr olunması məni çox sevindirir.
Bu sözləri AZƏRTAC-a açıqlamasında “Jean Monnet de Saint-Etienne” universitetinin doktorantı Moukala Nguimbi Franck Gordan söyləyib.
“Bu tədbirdə iştirak etmək mənim üçün xüsusi əhəmiyyət daşıyır. Çünki mənim ölkəm uzun illər Fransa müstəmləkəçiliyinə məruz qalıb və yalnız 1960-cı ildə müstəqillik qazanıb. Bu gün də kolonializmin cəmiyyətlərimizin inkişafına təsirləri hiss olunmaqdadır. Xüsusilə mənzil təminatı, içməli suya çıxış və əsas infrastruktur sahələrində həmin təsirlərin nəticələri açıq şəkildə görünür”, - deyə o bildirib.
O, məqsədlərinin cəmiyyətin daha çox kənarda qalan təbəqələri üçün konkret və dayanıqlı həll yolları tapmaq olduğunu vurğulayıb.
Bildirib ki, hər bir insanın layiqli mənzilə, içməli suya və daha yaxşı yaşayış şəraitinə çıxış hüququ təmin olunmalıdır.
Eyni zamanda, müxtəlif qitələrdən olan gənclərin bir araya gələrək bu problemləri müzakirə etməsi və öz reallıqlarına uyğun həll yolları təklif etməsi sevindirici haldır. Bu cür platformalar təcrübə mübadiləsi və ortaq yanaşmaların formalaşdırılması baxımından mühüm əhəmiyyət daşıyır.
Bölmənin digər xəbərləri
