Qalmaqalın böyüdüyü Çexiyada müxalifət hökumətə etimadsızlıq votumu tələb edir
Praqa, 12 iyun, AZƏRTAC
Çexiyanın ANO müxalifət partiyası bitkoin qalmaqalı ilə əlaqədar Petr Fialanın koalisiya hökumətinə etimadsızlıq ifadə etmək üçün parlament iclasının çağırılması tələbində israr edir.
AZƏRTAC bundan əvvəl xəbər vermişdi ki, bu qalmaqal Çexiya Ədliyyə Nazirliyinin təxminən 40 milyon avro dəyərində bitkoini hədiyyə olaraq qəbul etməsi ilə bağlıdır.
ANO fraksiyasının sədri Alena Şillerova Çexiyanın ČTK xəbər agentliyinə bildirib ki, parlament üzvləri gələn həftə - çərşənbə axşamı görüşə bilərlər. Hökumət nümayəndələri ilə ilkin razılaşmaya əsasən, koalisiya üzvü olan ODS - Vətəndaş Demokratlar fraksiyasının sədri Marek Bendanın təsdiq etdiyi kimi, sessiya çərşənbə günü də davam edə bilər.
Nazirlər Kabinetinə etimadsızlıq votumu üçün 200 deputatdan ən azı 101-i səs verməlidir. Fialanın koalisiya hökuməti dördüncü dəfə müxalifətin onu istefaya göndərmək cəhdləri ilə üzləşəcək. Müxalifətin ilk dəfə, 2022-ci ilin sentyabrında belə bir təklif irəli sürməsi uğursuz olmuşdu.
Xatırladaq ki, istintaqın versiyasına görə, kriptovalyutanı həmin nazirliyə 2017-ci ildə oğurluq, narkotik vasitələrin qanunsuz dövriyyəsi və qeyri-leqal silah saxlama ittihamı ilə həbs olunmuş Tomaş Yirjíkovski verib. O, öz cinayət əməllərini həyata keçirən “darknet” internet platformasına rəhbərlik edirdi.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
