Qanunsuz ov halları ilə mübarizə gücləndirilmişdir
Bakı, 12 mart (AZƏRTAC). Ekologiya və Təbii Sərvətlər Nazirliyinin (ETSN) aidiyyəti qurumlarının əməkdaşları martın 4-10-da ölkə ərazisində “Ovçuluq haqqında” Azərbaycan Respublikası Qanununun tələblərinə əməl olunması vəziyyətini araşdırmaq məqsədi ilə növbəti reydlər keçirmişdir.
ETSN-in mətbuat xidmətindən AZƏRTAC- a verilən məlumata görə, Qızılağac Dövlət Təbiət Qoruğunda qanunsuz balıq ovu ilə məşğul olan Masallı sakini Musabala Əliyevdən qayıq, elektrik gücləndiricisi, akkumulyator və 13 külmə balığı aşkar edilərək götürülmüşdür. Həmin şəxsin əməlində cinayət tərkibi olduğu üçün barəsində tərtib edilmiş sənədlər Su Nəqliyyatında Lənkəran Rayon Xətt Polis Şöbəsinə göndərilmişdir.
Mahmudçala Ovçuluq Təsərrüfatı ərazisində Biləsuvar rayonu Bəydili kənd sakini Nicat Əzizov və Xırmandalı kənd sakini Şahin Kazımov saxlanılmış, qanunsuz ov etdikləri üçün hər biri 1000 manat məbləğində cərimə olunmuşdur.
Zaqatala rayonu Dombabinə kəndinin “Qırğıllıbinə” adlanan sahəsində də qanunu pozan Masqarabinə kənd sakini Kazım İmamhüseynovdan 1 ov tüfəngi götürülmüş və həmin şəxs 1000 manat cərimə edilmişdir.
Oğuz rayonu ərazisində keçirilən reyd zamanı Sincan kənd sakini Mehman Abdulqədirov qanunsuz ov etdiyi üçün tüfəngi müsadirə edilmiş, qanunu pozan şəxs 1000 manat cərimə ödəmişdir.
Bölmənin digər xəbərləri
