İQTİSADİYYAT
Qarabağ regionuna investisiyaların cəlb edilməsi bu ərazilərin inkişafında mühüm rol oynayacaq
Bakı, 1 sentyabr, Ramiz Quliyev, AZƏRTAC
İşğaldan azad olunan ərazilərdə həyata keçiriləcək mühüm tədbirlərdən biri də investisiya qoyuluşudur. Böyük potensiala malik olan bu regiona xarici və daxili investorların cəlb edilməsi hazırda qarşıda duran prioritet məsələlərdən biridir.
Bu barədə AZƏRTAC-a açıqlamasında Azərbaycan Memarlıq və İnşaat Universitetinin müəllimi, memar Tərlan Əliyev deyib.
Onun sözlərinə görə, həmin ərazilərdə tikinti, aqrar sektor, enerji, mədən sənayesi, turizm sektoru kimi sahələrin inkişafı prioritetlik təşkil edə bilər. Qarabağ və Şərqi Zəngəzur iqtisadi rayonlarında bu sahələr çox yüksək inkişaf perspektivinə malikdir.
T.Əliyev bildirib ki, Prezident İlham Əliyev tərəfindən yaradılan “Qarabağ Dirçəliş Fondu” işğaldan azad edilmiş ərazilərə xarici və daxili investisiyaların cəlb edilməsi, iqtisadiyyatın yenidən qurulması və inkişafı üçün olduqca mühüm amildir. İnvestisiyaların bu ərazilərə yönəldilməsi zamanı həmin regionun təbii sərvətlərinin, iqliminin, geoloji mövqeyinin hər bir rayon üzrə tədqiq edilməsi və ümumi strukturun qurulması, bu prosesin sürətlənməsinə, eyni zamanda, daxili və xarici investorların bu sahədə daha səmərəli fəaliyyətinə təkan verəcək: “Regionda aqrar sektorun inkişafı üçün torpaq və iqlim faktorları mühüm rol oynayır. Qarabağ ərazisindəki 7 rayonun əkinə yararlı torpaq sahələrinin ümumi həcmi 535 min hektardan artıqdır. Bunu nəzərə alsaq, bu sektora böyük investisiya qoyuluşları çox böyük fayda verəcək. Bundan başqa, Qarabağda həyata keçiriləcək bərpa və yenidənqurma işləri zamanı yerli tikinti materiallarından istifadə olunması üçün əlverişli şərait mövcuddur. Nəticə etibarilə tikinti xammalına qoyulan investisiya həm investora, həm də dövlətə yol və nəqliyyat xərclərinin azaldılması, tikinti materiallarının güzəştli istehsalı və satışı kimi məsələlərdə gəlir və səmərəlilik gətirəcək”.
Qeyd olunub ki, Qarabağ ərazisində nəqliyyat infrastrukturunun tamamilə yararsız hala salınması bu problemin həllini xüsusilə vacib edir. Bu baxımdan nəqliyyat infrastrukturunun bərpası istiqamətində yeni layihələrin həyata keçirilməsi, investisiyanın cəlb olunması həmin ərazilərdə əhalinin məskunlaşmasına birbaşa təsir göstərəcək. Bu sahədə artıq müəyyən işlər də görülüb. Belə ki, Füzuli-Hadrut, Kəlbəcər-Laçın avtomobil yolları, Horadiz-Ağbənd, Bərdə-Ağdam dəmiryolları yenidən qurulur, Füzuli-Şuşa və Horadiz-Ağbənd dəmir yolu xətti tikilir. Artıq Füzuli beynəlxalq hava limanı istifadəyə verilib. Bütün bu tədbirlər bölgədə aparılan iqtisadi islahatların sürətlənməsinə münbit şərait yaradır.