Qazaxıstan Aktau limanında böyük konteyner habı inşa edir
Bakı, 26 noyabr, AZƏRTAC
“Qazaxıstan Dəmir Yolu” Milli Şirkətinin törəməsi olan "KazmorTransFlot" şirkəti Orta Dəhliz marşrutu üzrə yükdaşımaları artırmaq məqsədilə 6 yeni konteyner daşıyan gəmi alır.
AZƏRTAC xəbər verir ki, bunu şirkətin İdarə Heyətinin sədri Talqat Aldıbergenov MDB Dəmir Yolu Nəqliyyatı Şurasının 83-cü iclası çərçivəsində jurnalistlərə açıqlaması zamanı deyib.
O bildirib ki, Orta Dəhlizlə bağlı əsas çətinlik Xəzər dənizində gəmi və bərə çatışmazlığıdır.
“Hazırda Xəzər dənizi üzərindən keçid Orta Dəhliz üzrə daşımaların sürətinə və stabil ritminə təsir göstərən əsas məhdudlaşdırıcı amildir. Alınacaq gəmilərin 2027-ci ilin birinci yarısında dəhlizə qoşulacağı gözlənilir. Qazaxıstan həmçinin Aktau limanında böyük konteyner habı inşa edir. İlk pilot terminal bu ilin sonuna qədər istifadəyə veriləcək və illik gücü 140 min TEU olacaq”, - deyə Talqat Aldıbergenov vurğulayıb.
T.Aldıbergenov qeyd edib ki, ikinci mərhələdə terminalın ümumi yükaşırma gücü 240 min TEU-ya çatdırılacaq və işlərin 2026-cı ildə yekunlaşması planlaşdırılır: “Orta Dəhlizə Çinin konteyner daşıma şirkəti olan "China Railway Express"in qoşulması bu marşrut üzrə daşımaları iki dəfə artıracaq. Hazırda bu marşrut üzrə artım 12 faiz təşkil edir”.
Bölmənin digər xəbərləri
