Qazaxıstan xarici investorlara 300 min dollara müvəqqəti yaşayış hüququ təklif edir
Astana, 19 avqust, AZƏRTAC
“Astana” Beynəlxalq Maliyyə Mərkəzi (ABMM) investisiya vergi rezidentliyi proqramını genişləndirir.
AZƏRTAC ABMM-ə istinadla xəbər verir ki, xarici investorlar Mərkəzdə qeydiyyatdan keçmiş şirkətlərin nizamnamə kapitalına investisiya qoya bilərlər. Miqrasiya xidmətlərinin əldə edilməsində müşayiət ABMM Ekspat Mərkəzi vasitəsilə həyata keçirilir.
Bildirilir ki, dünyada 80-dən çox investisiya miqrasiyası proqramı mövcuddur ki, bu proqramlar xarici sərmayələrin cəlb edilməsi, iqtisadi artımın stimullaşdırılması və ölkənin qlobal bazarda mövqeyinin möhkəmləndirilməsi üçün mühüm alət rolunu oynayır.
İnvestor beş ilədək müddətə viza və ya Qazaxıstanda müvəqqəti yaşayış hüququ almaq imkanı əldə edir. Bundan əlavə, ona sadələşdirilmiş qaydada xarici gəlirləri vergidən azad etməklə vergi rezidenti statusu verilir.
İnvestisiya 60 min dollar olduqda xarici investora beşillik viza, 300 min dollarlıq investisiya ilə isə ölkədə yaşamaq üçün icazə verilir.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
