QAZAXISTANDA MDB MƏKANINDA ƏN BÖYÜK MÜKAFAT FONDU OLAN CIDIR YARIŞI KEÇİRİLƏCƏK

12.05.2004 [12:47]
Çap et
A⁺ A^-

AZƏRTAC-ın Almatıdan aldığı xəbərə görə, Qazaxıstanda MDB məkanında ən böyük mükafat fondu olan cıdır yarışı keçiriləcəkdir. Mayın 16-da respublikada cıdır mövsümü açılacaq və ölkənin açıq çempionatı başlanacaqdır. Yarışın ümumi mükafat fondu 450 min dollardır. Ötən il bu məqləğ 3 dəfə az – 150 min dollar idi. Çempionatda Rusiya, Özbəkistan, Slovakiya və Çexiya jokeyləri də iştirak edəcəklər. Almatı cıdır meydanının direktoru Nurlan Tlevlesov bildirmişdir: “Yeni mövsümdə Qazaxıstanın ən yaxşı cıdır atları, o cümlədən 30 cins ərəb, 120 cins ingilis atı qələbə uğrunda mübarizə aparacaqdır”. 13 gün ərzində yerli at sahibləri özlərinin cins atlarını cıdırın təkcə klassik növündə deyil, həm də milli at idmanı növlərində sınaqdan çıxaracaqlar.

MDB-də ilk dəfə olaraq, bu yarışlarda jokeylərin və onların atlarının sığortalanması təcrübəsi tətbiq ediləcəkdir. Hazırda respublikada cins atçılıq kənd təsərrüfatının elit sahəsi kimi inkişaf edir, ən bahalı cıdır atının dəyəri isə (cins ingilis atı) 300 min dollardır. “Qazaxıstan jokey klubu” yerli atların cinsini yaxşılaşdırmaq üçün Amerika, İngiltərə, Fransa və Almaniyadan qiymətli at cinsləri alır. Qazaxıstan atçıları bu klubun köməyi ilə öz atlarını Beynəlxalq cins atlar kitabında qeydiyyata aldıra bilirlər ki, bu da onlara öz yetirmələrini beynəlxalq yarışlara çıxarmaq, onları xaricdə satmaq imkanı verir. Tlevlesov onu da vurğulamışdır ki, hazırda Almatı cıdır meydanı postsovet məkanında ən dinamik inkişaf edən cıdır meydanıdır.

Cıdır mövsümü 5 ay davam edəcək və oktyabrın 17-də başa çatacaqdır.