Qazaxıstanda qar uçqunu nəticəsində bir nəfər ölüb
Astana, 17 mart, AZƏRTAC
Qazaxıstanın Şımbulak dağ-xizək kurortunda faciə baş verib.
AZƏRTAC “Kazinform”a istinadla xəbər verir ki, 3 nəfərin qadağan olunmuş zonada xizək sürməsi qar uçqunu yaradıb. Nəticədə hər üçü qarın altında qalıb.
Hadisə əsas kurort ərazisindən təxminən bir kilometr kənarda - Komsomol rayonunun ucqar hissəsində baş verib. Xizəkçilərdən ikisi qarın altından çıxa bilib, üçüncünü isə xilasedicilər çıxaranda artıq dünyasını dəyişmişdi.
Xilasedicilər bildiriblər ki, dağlarda yüksək qar uçqunu təhlükəsi var. Turistlər və həvəskarlardan təhlükəsizlik tədbirlərinə riayət etməyə və qar uçqunu təhlükəsi ilə bağlı məlumatları əvvəlcədən dəqiqləşdirməyə çağırış edilib.
Şımbulak Almatı yaxınlığında Qazaxıstanın məşhur dağ-xizək kurortudur. Bu zona Zailiyski Alatau silsiləsində, yüksək dağda yerləşən "Medeu" buz meydançasından bir qədər yuxarıda yerləşir.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
