Qazaxıstanın çövkən millisinin üzvü: Azərbaycan yarışın favoritidir
Şəki, 2 oktyabr, AZƏRTAC
Oyun çox çətin keçdi. Türkiyə yığması əla oynadı. Bizə yaxşı müqavimət göstərdilər. Hesab 3:0 olsa da, qələbəni çətinliklə əldə etdiyimizi deməliyəm.
AZƏRTAC xəbər verir ki, bu sözləri Qazaxıstanın çövkən millisinin üzvü Adilxan Həsənov III MDB Oyunlarında Türkiyə yığmasına 3:0 hesabı ilə qalib gələrək yarımfinala yüksəldikləri matç barədə danışarkən deyib.
Komandasının bir qolunun müəllifi yağışlı hava şəraitinə baxmayaraq, yaxşı çıxış etdiklərini söyləyib: “Nəticədən məmnunam. Yaxşı performans göstərərək, yarımfinala keçdik. Sevindiricidir ki, nə biz, nə də atlar xəsarət aldı”.
O, turnirdə Azərbaycanı favorit gördüyünü bildirib: “Düşünürəm ki, onlar çempion olacaqlar. Qırğızıstan, Özbəkistan və Qazaxıstanın da şansları var”.
A.Həsənov Oyunların təşkilatçılığından razı qaldığını deyib. “Burada hər şey əladır. Təşkilatçılıq xoşumuza gəlir. Buranı ilk dəfədir görürük. Bundan əvvəl Bakıda olmuşuq. Bakı da xoşumuza gəlmişdi. Burada fərqli atmosfer var. Şəkinin gözəl təbiəti, dağları var. Oyunları burada təşkil etmək əla ideyadır”, - deyə o əlavə edib.
Qeyd edək ki, çövkən yarışlarına oktyabrın 7-də yekun vurulacaq.
Bölmənin digər xəbərləri
