Qobustan rayonunda Şıxzəyirli palçıq vulkanı oyanmışdır
Bakı, 13 mart (AZƏRTAC). Martın 13-də Qobustan rayonu ərazisində Şıxzəyirli palçıq vulkanında püskürmə baş vermişdir.
AZƏRTAC Fövqəladə Hallar Nazirliyinin rəsmi saytına istinadla xəbər verir ki, şahidlərin dediyinə görə, püskürmədən əvvəl partlayış səsi eşidilmiş, palçıq brekçiyası püskürmüş, sonra isə alov görünmüşdür. Alovun hündürlüyü 50 metrdən çox olmuşdur. Baş verə biləcək fövqəladə halların qarşısının alınması məqsədi ilə nazirliyin mütəxəssisləri və xilasediciləri dərhal hadisə yerinə göndərilmişlər.
Hazırda Şıxzəyirli palçıq vulkanında fəallıq getdikcə azalmağa başlayır. Vulkan ətrafında mövcud olan bəzi sopkalarda palçıq axını müşahidə olunur. Krater ətrafında dərin çatlar görünür.
Vulkan püskürməsi kənd əhalisi üçün təhlükə törətmir.
Mütəxəssislər araşdırmaları davam etdirirlər.
Bölmənin digər xəbərləri
