Qondarma "seçkilər"in keçirilməsi regionda sülh prosesinin qarşısını almaq xarakteri daşıyır ŞƏRH
Bakı, 11 sentyabr AZƏRTAC
Sentyabrın 9-da Azərbaycanın beynəlxalq səviyyədə tanınmış və müvəqqəti olaraq Rusiya sülhməramlılarının məsuliyyəti altında olan ərazilərində qondarma prezident seçkilərinin keçirilməsi nəinki beynəlxalq qanunlara və hüquq normalarına ziddir eləcədə regionda sülh prosesinin qarşısını almaq xarakteri daşıyır.
Bu fikri AZƏRTAC-a müsahibəsində Milli Məclisin deputatı Sadiq Qurbanov deyib. O bildirib ki, 44 günlük Vətən müharibəsi zamanı Azərbaycanın öz torpaqlarını azad etməsi Ermənistanın bəzi qüvvələrinə rahatlıq vermir. Müstəqil siyasət yürüdə bilməyən rəsmi İrəvan separatçıları dəstəkləməklə sülh prosesini uzatmağa və regiondakı sabitliyi pozmağa cəhd edir.
Digər tərəfdən beynəlxalq təşkilatlar və müxtəlif dövlətlərdə Azərbaycanın təzyiqi ilə üzləşdiyini təbliğ edir. Separatçıların qondarma prezident seçkiləri heç bir beynəlxalq qurum tərəfindən tanına bilməz. Ermənistan elə düşünür ki, separatçıları dəstəkləyib orada prezident seçkiləri keçirsə siyasi üstünlük əldə edəcək. Lakin Ermənistanın yanlış siyasi hesablaması özünü doğrultmadı.
Deputat bildirdi ki, artıq beynəlxalq təşkilatların nümayəndələri özlərinin neqativ reaksiyalarını göstərərək qondarma seçkiləri pisləyir və bunun sülhə xidmət etmədiyini bəyan edirlər. Məsələn, Avropa Şurasının Baş katibi Mariya Peyçinoviç bildirib ki, Xankəndidə qondarma “prezident seçkiləri”nin heç bir hüquqi əsası yoxdur. Humanitar vəziyyət və beynəlxalq normalara hörmət əsasdır. Avropa Şurası gərginliyi azaltmağa, dialoqa başlamağa və sülhü bərpa etməyə çağırır. Xanım Mariya Peyçinoviç qeyd edib ki, Avropa Şurası sülh prosesini dəstəkləməyə hazırdır. Bununla yanaşı, Avropa İttifaqı (Aİ) da qondarma seçkilərə mənfi münasibətini bəyan edib. Aİ-nin xarici işlər və təhlükəsizlik siyasəti üzrə nümayəndəsi Nabila Massarali qurumun adından çıxış edərək bildirib ki, Avropa İttifaqı seçkini və onun nəticələrini tanımır. Beynəlxalq təşkilatlardan İslam Əməkdaşlıq Təşkilatı (İƏT) və TürkPA da seçkilərə kəskin mənfi münasibət bildiriblər. Beynəlxalq təşkilatların rəyi o baxımdan əhəmiyyətlidir ki, Ermənistanın separatçılığı təşviq etmək və sülhü pozmaq cəhdini təşkilata daxil olan bütün dövlətlər pisləyir. Bu da beynəlxalq aləmdə Ermənistanın mənfi imicli bir dövlət kimi tanınmasını şərtləndirir.
“Artıq Böyük Britaniya, Gürcüstan, Pakistan, Moldova, Ukrayna, Türkiyə qondarma seçkiləri təhlükəsizliyə təhdid kimi dəyərləndiriblər, qondarma “prezident” seçkilərini və onun nəticəsini tanımayacaqlarını bəyan ediblər. Bütün bunları qabaqcadan bilən separatçı rejimin rəhbərləri hansı məntiqlə “prezident seçkisi” keçiriblər? Məsələnin mahiyyəti ondan ibarətdir ki, həm Ermənistan, həm də qondarma qurum müstəqil deyil, kənar qüvvələrin istəyi üzərindən siyasət aparırlar. Bunun da sonu məğlubiyyətlə nəticələnəcək. Ermənistan artıq bir dəfə ağır məğlubiyyətə uğrayıb. Vətən müharibəsi zamanı Ordumuz cəmi 44 gün ərzində torpaqlarımızı işğaldan azad etdi. İkinci məğlubiyyətə nə Ermənistan, nə qondarma qurum dözə bilməyəcək”, - deyə deputat vurğulayıb.
Bölmənin digər xəbərləri
