Qoşulmama Hərəkatı Azərbaycanın sədrliyində səmərəli fəaliyyəti ilə BMT-ni kölgədə qoymağı bacardı – Şərh
Bakı, 6 iyul, AZƏRTAC
Azərbaycanın dünyanın ikinci ən nəhəng təşkilatı olan, 120-dən çox dövləti üzv, 18 dövləti və 10 beynəlxalq təşkilatı isə müşahidəçi qismində öz çətiri altında birləşdirən Qoşulmama Hərəkatına rəhbərliyi dördüncü ildir ki, uğurla davam edir. Bu illər ərzində dövlətimiz bir təşkilata rəhbərlik edərək onun işinə, məqsədlərinə və qarşısına qoyduğu hədəflərə nail olmaq üçün ən uğurlu və müsbət nümunəni ortaya qoyub. Təşkilata sədrliyimizin insanlıq və bəşəriyyət üçün ən çətin bir dönəmə, dünyanı cənginə alan COVID-19 pandemiyası ilə mübarizə dövrünə təsadüf etməsinə baxmayaraq, bu amil Azərbaycanın fəaliyyətinə mənfi təsir etmədi. Əksinə, belə bir ümumbəşəri problemlə mübarizə üçün dövlətimiz həmin platformadan istifadə edərək mühüm qlobal çağırışlar etdi. Hətta BMT Baş Assambleyasının xüsusi sessiyasının çağrılmasına nail olmaqla demək olar ki, bütün dünya dövlətlərini bir qlobal problemin həlli ətrafında birləşdirdi.
Bu fikirləri AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri Xəyal Bəşirov səsləndirib.
X.Bəşirovun sözlərinə görə, üçillik yekdil səs çoxluğu ilə etdiyi sədrlik müddətinin elə yenə də yekdilliklə bir il müddətinə uzadılması dövründə 150-yə yaxın beynəlxalq subyektin rəhbəri kimi Prezident İlham Əliyevin sədrliyi ilə Azərbaycan Qoşulmama Hərəkatına həm də institusional dəyişikliklər baxımından böyük töhfələr verib. Parlament Şəbəkəsinin və Gənclər Təşkilatının yaradılması, qadınlar platformasının formalaşdırlması prosesinin isə uğurla davam etdirilməsi bu istiqamətdə atdığımız uğurlu addımlar kimi təşkilatın tarixinə yazıldı.
Bu illər ərzində Azərbaycan pandemiya ilə mübarizə çərçivəsində ədalətli tədbirlərin həyata keçirilməsi, vaksin ayrı-seçkiliyinin qarşısının alınması, dövlətlərə inkişaf səviyyəsindən, yerləşmə regionundan və digər amillərdən asılı olmayaraq bərabər münasibətin göstərilməsinə nail oldu. Qlobal çağırışları və təşəbbüsləri, sadəcə, bu addımlarla məhdudlaşmayan Azərbaycan həm də, pandemiya ilə mübarizə üçün 80-dən çox ölkəyə maliyyə və humanitar yardım göstərib, 5 dövləti vaksinlə təmin edib və Ümumdünya Səhiyyə Təşkilatına 10 milyon ABŞ dolları məbləğində könüllü yardım göstərib. Bu ilin martında ölkəmizdə təşkilatın növbəti tədbirinə ev sahibliyi etməklə pandemiyadan sonra dövlətlərin, xüsusilə də yoxsul və ada ölkələrinin iqtisadiyyatlarının bərpası ilə bağlı təşəbbüs ortaya qoyan QH-nin sədri Azərbaycan iki istiqamətdə ilk donorluq rolunu da öz üzərinə götürdü.
“Bakıda keçirilən və bütün dünyanın diqqətində olan “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlərin görüşü zamanı çıxış edən Prezident İlham Əliyev təşkilatın ən uzunmüddətli sədri kimi yenə də dünyaya önəmli çağırışlar etdi. Təşkilata üzv olan və uzun illər Fransanın müstəmləkəçilik siyasətindən əziyyət çəkən dövlətlərin nazirlərinin iştirakı ilə Fransadan etdiyi cinayətlərə görə gec də olsa zərərçəkmişlərdən üzr istəməsi çağırışını etdi. Dünyada artıq presedent olan bu üzr istəmə təşəbbüsü təşkilatın üzvləri tərəfindən yekdilliklə dəstəklənir. Ümumiyyətlə, təşkilata sədrliyimiz dönəmində yürütdüyümüz praqmatık xarici siyasətin və uğurlu diplomatiyanın ən əhəmiyyətli istiqamətlərindən biri Qoşulmama Hərəkatındakı fəaliyyətimizdir. Bir dövlətin mötəbər beynəlxalq platformadan istifadə edərək həm onun işində, həm də beynəlxalq aləmdə ədalətin və hüququn aliliyinin təmin olunması prosesində rol alması ən yüksək səviyyədə yalnız bu şəkildə ola bilər”, - deyə Siyasi və Hüquqi Araşdırmalar Mərkəzinin rəhbəri diqqətə çatdırıb.
O vurğulayıb ki, Azərbaycan bu platformadan təkcə özünün keçmiş probleminin həlli istiqamətində deyil, ümumilikdə təşkilatın bütün üzvlərinin və beynəlxalq ictimaiyyətin maraqlarının təmin olunmasına və hüquqlarının qorunmasına çalışdığını nümunəvi fəaliyyəti ilə sübut edib. Bir sözlə, Qoşulmama Hərəkatı Azərbaycanın sədrliyində qlobal çağırışları, insanlığın problemlərinin həlli istiqamətində irəli sürdüyü təşəbbüsləri və səmərəli fəaliyyəti ilə BMT-ni belə kölgədə qoymağı bacarıb.
Bölmənin digər xəbərləri
