Qoşulmama Hərəkatının institusional inkişafı Azərbaycanın sədrliyinin nailiyyətidir
Bakı, 8 iyul, AZƏRTAC
Qoşulmama Hərəkatının Əlaqələndirmə Bürosunun Bakıda keçirilən “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlər görüşü bir daha Azərbaycanın beynəlxalq münasibətlər sistemində artan nüfuzuna işıq saldı. 2019-cu ildə Azərbaycan Qoşulmama Hərəkatının üzv ölkələrinin yekdil qərarı ilə üç il müddətinə quruma sədrliyi həyata keçirməyə başladı. Azərbaycanın sədrliyi dövründə gördüyü işlərə, irəli sürdüyü təşəbbüslərə və təsisatın fəaliyyətinin genişləndirilməsi, beynəlxalq aləmdə nüfuzunun artması istiqamətində atdığı addımlara görə ölkəmizə etimadın göstəricisi kimi Hərəkata sədrliyimiz daha bir il uzadıldı. Nəzərə alsaq ki, Azərbaycanın Qoşulmama Hərəkatına sədrliyi dünyanın koronavirus pndemiyasına qarşı mübarizə tədbirlərinə başladığı dövrə təsadüf edir, bu halda irəli sürdüyü təşəbbüslərin uğurlu nəticələrindən danışmamaq mümkünsüzdür. Bir mühüm məqamı xüsusi qeyd etməliyik ki, Azərbaycan biri-birinə əks qütbləri bir araya gətirərək COVID-19-un qlobal problem olduğunu və bunun üçün qlobal mübarizənin aparılmasının vacibliyini vurğuladı. Prezident İlham Əliyevin təşəbbüsü ilə əvvəlcə Türk Şurasının, sonra isə Qoşulmama Hərəkatının Zirvə görüşlərinin keçirilməsi və koronavirusla birgə mübarizənin sonrakı dövrlərdə müsbət nəticələri diqqətdən kənarda qalmadı. Qoşulmama Hərəkatı dünyada BMT Baş Assambleyasından sonra ən böyük beynəlxalq təsisatdır. Azərbaycan Prezidenti İlham Əliyevin sayəsində ölkəmiz bu təsisata uğurla rəhbərlik etməklə onun beynəlxalq aləmdə nüfuzunu və rolunu gücləndirib, böyük uğura imza atıb.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib.
Deputat qeyd edib ki, Qoşulmama Hərəkatının institusional inkişafı, xüsusən də 2021-ci və 2022-ci qurumun Parlament Şəbəkəsinin və Gənclər Təşkilatının yaradılması Azərbaycanın sədrliyinin nailiyyətləri sırasındadır. Dövlətimizin başçısı Qoşulmama Hərəkatının Əlaqələndirmə Bürosunun nazirlər görüşündə bu mühüm məqamı da xüsusi qeyd etdi ki, hazırda qurumun qadınlar platformasının yaradılması üzərində işlər gedir. İnstitusional davamlılığa doğru atılan bu addımlarla növbəti sədrlərə mütləq uğurlu bir miras qoyacağıq. Azərbaycan, həmçinin postpandemiya dövrü haqqında düşünməli oldu. Ümumilikdə Prezident İlham Əliyevin Qoşulmama Hərəkatının sədri kimi beynəlxalq müstəvidə ardıcıl şəkildə irəli sürdüyü təşəbbüs və təkliflər daim həm Hərəkat, həm də digər ölkələrin geniş dəstəyini qazanıb.
Deputat qeyd edib ki, Azərbaycan yenidən formalaşan dünya nizamında Qoşulmama Hərəkatının nüfuzunu artırmaq, söz sahibliyini təmin etmək üçün mühüm addımları və çağırışları ilə diqqətdədir. Dövlətimizin başçısının Bakı nazirlər görüşündə çıxışı hazırda dünya mətbuatında geniş şərh olunmaqdadır. Prezident İlham Əliyev əvvəlcə dünyada sülhün və təhlükəsizliyin pozulmasına gətirib çıxaran səbəbləri, həmçinin çıxış yollarını açıqladı. Bu reallıq bir daha vurğulandı ki, hazırda beynəlxalq təşkilatlar, xüsusilə BMT bəşəriyyətin gözləntilərinə cavab vermir. BMT-də ciddi islahatların aparılması qaçılmazdır.
Malik Həsənov diqqəti 30 illik işğal dövrünün reallıqlarına yönəldərək bildirib ki, BMT Təhlükəsizlik Şurasının 4 qətnaməsində Qarabağın Azərbaycanın ayrılmaz tərkib hissəsi olduğu, erməni silahlı birləşmələrinin bu ərazilərdən qeyd-şərtsiz çıxarılmasının vacibliyi yer alsa da, ölkəmiz 28 il bu qətnamələrin icrasını gözlədi. Qətnamələrin icrası üçün vahid mexanizmin olmaması münaqişələrin həlli prosesinin uzanmasına, ümumilikdə dünyada etimad mühitinə öz mənfi təsirini göstərir. Bu isə təsdiqləyir ki, dünya ədalət və beynəlxalq hüquq problemini yaşayır.
Bölmənin digər xəbərləri
