Qurban bayramı ilə əlaqədar heyvanların satışı və kəsimi həyata keçirilir VİDEO
Bakı, 6 iyun, Nailə Həsənova, AZƏRTAC
İyunun 6-sı səhər saatlarından Bakının Binəqədi rayonu, Cəfər Xəndan küçəsi, 52C ünvanındayıq. Bura Azərbaycan Qida Təhlükəsizliyi Agentliyi tərəfindən Qurban bayramı ilə bağlı təşkil olunan qurbanlıq heyvan satışı və kəsimi məntəqələrindən biridir.
AZƏRTAC-ın əməkdaşları qurbanlıq heyvanların satışı və kəsimi məntəqəsində olub, satıcı və alıcıların təəssüratını öyrənib.
Satış və kəsim məntəqəsində böyük bir qələbəlik müşahidə olunur. Qurbanlıq heyvanları alanlarla satıcılar arasında qiymətdə razılaşanlar kəsim məntəqəsinə keçirlər. Burada da canlanma var. Satıcılar alıcılıq qabiliyyətindən razıdırlar.
Satıcı Elşad Sadıqov qurbanlıq heyvanları Ağcabədi və Bərdədən gətirdiyini bildirərək deyib: “Bayrama görə qiymətləri münasib etmişik. Heyvanın çəkisinə görə qiymət 19-21 manat arasında dəyişir. Qiymətlər ötən illə müqayisədə stabildir. Bayram günlərində alıcılarımız kifayət qədərdir”.
Satıcı Asif Vəliyev xırdabuynuzlu heyvanları Bərdə, Ağcabədi və Beyləqandan gətirib. Qiymətlər 18-22 manat arasında dəyişir. Balaca heyvan bahadır, böyük heyvan ucuzdur. Çəkisi daha ağır heyvanlara tələbat çoxdur.
Satıcı Zakir İmanov 30 ildir qurbanlıq heyvanların satışı ilə məşğul olduğunu qeyd edərək bildirib: “Qurbanlıq heyvanları Beyləqandan gətirmişik. Qiymət aşağı-yuxarı eynidir. Güzəştə də gedirik”.
Alıcılar da qurbanlıq heyvanların qiymətlərinin qənaətbəxş olduğunu düşünürlər.
Alıcı Afaq Maniyeva: "Qurbanlıq heyvanların qiymətləri münasibdir, ötənilki kimi, 20-22 manat arasında dəyişir. Hər il olduğu kimi, bu il də qurbanlığı imkansız şəxslərə paylayırıq”.
Alıcı Elşən Əliyev isə deyir ki, keçən ilə nisbətən bahalaşma müşahidə olunsa da, istədiyi qurbanlığı ala bilib.
Alıcı Məleykə Məmmədova qeyd edib: “Hər il qurbanlıq kəsirik. Bu il qiymətlərdən razıyıq”.
Qeyd edək ki, ümumilikdə qurbanlıq heyvan kəsimi və satışının müvafiq norma və qaydalara uyğun, rahat şəraitdə həyata keçirilməsi məqsədilə bu il Naxçıvan Muxtar Respublikası da daxil olmaqla, ölkə üzrə 135 ünvanda qurbanlıq heyvanların satışı və kəsimi xidmətləri təşkil olunub. Onlardan 77-də həm kəsim, həm də satış, 30-da qurbanlıq heyvanların yalnız satışı, 28-də isə yalnız heyvan kəsimi xidmətləri təklif olunur.
Bu məntəqələrdə baytarlıq nəzarətindən keçmiş və sanitar-gigiyenik tələblər gözlənilməklə kəsilmiş qurbanlıq heyvanlar əhaliyə təqdim edilir.
Bölmənin digər xəbərləri
