CƏMİYYƏT
Quşçuluq şirkətlərinin təklifləri hökumətə təqdim edilib VİDEO
Bakı, 22 fevral, AZƏRTAC
Kənd Təsərrüfatı Nazirliyinin Fermerlər, assosiasiyalar və kooperativlərlə iş şöbəsi ilə “Quşçular Cəmiyyəti” İctimai Birliyi arasında “Ölkədə quşçuluğun mövcud vəziyyəti və qarşıda duran vəzifələr” mövzusunda görüş keçirilib.
Aqrar Tədqiqatlar Mərkəzində keçirilən görüşdə Kənd Təsərrüfatı Nazirliyinin nümayəndələri və quşçuluq sahəsində fəaliyyət göstərən sahibkarlar iştirak ediblər.
AZƏRTAC xəbər verir ki, tədbiri açan Kənd Təsərrüfatı Nazirliyinin Fermerlər, assosiasiyalar və kooperativlərlə iş şöbəsinin müdiri Araz İsmayılov ölkədə kənd təsərrüfatının inkişafına dövlət dəstəyi, aqrar sahənin inkişafı ilə bağlı görülən işlər barədə ətraflı məlumat verib. Respublikamızda quşçuluq sahəsinin inkişafının dövlətin diqqət mərkəzində olduğunu deyən şöbə müdiri bu sahədə fəaliyyət göstərən sahibkar və fermerlərlə mütəmadi görüşlərin keçirildiyini vurğulayıb. Araz İsmayılov “Ölkədə quşçuluğun mövcud vəziyyəti və inkişaf perspektivləri” mövzusunda təqdimatla çıxış edib.
Sonra çıxış edən Kənd Təsərrüfatı Nazirliyinin Heyvandarlığın təşkili və monitorinqi şöbəsinin müdiri Eldar Həsənov quşçuluğun daha da inkişaf etdirilməsinin əsas prioritetlərdən biri olduğunu vurğulayıb. Şöbə müdiri quşçuluq şirkətlərinin idxal olunan yem və yem əlavələrinin ƏDV-dən azad olunması ilə bağlı təkliflərinin ümumiləşdirilərək Kənd Təsərrüfatı və İqtisadiyyat Nazirlikləri tərəfindən hökumətə təqdim edildiyini vurğulayıb.
Daha sonra tədbir iştirakçıları quşçuluğun inkişafına dair fikirlərini bölüşüblər. Tədbirdə ölkədə quşçuluğun inkişafı məqsədilə qarşıya qoyulan vəzifələrə toxunulub, assosiasiya üzvləri tərəfindən səsləndirilən təkliflər qeydiyyata alınıb, bu cür müzakirələrin mütəmadi keçirilməsi qərara alınıb.
Toplantının sonunda “Quşçular Cəmiyyəti” İctimai Birliyinin adının dəyişdirilərək “Azərbaycan Quş əti, Yumurta İstehsalçıları və İxracatçıları Assosiasiyası” İctimai Birliyi adlandırılması barədə qərar qəbul olunub. Müzakirələrdən sonra qurumun nizamnaməsinə dəyişikliklər təsdiq edilib. Səsvermə nəticəsində Mürvət Həsənli Assosiasiyanın sədri seçilib. Bundan başqa, Assosiasiyanın 14 nəfərdən ibarət İdarə Heyəti də formalaşdırılıb, yeni üzvlər seçilib.
Qeyd edək ki, İctimai Birliyin fəaliyyətinin təkmilləşdirilməsi ilə bağlı sənədlər Ədliyyə Nazirliyinə təqdim ediləcək.