Rəcəb Tayyib Ərdoğan: İlk növbədə Qarabağ problemi həll olunmalıdır
İstanbul, 18 aprel, AZƏRTAC
Bizimlə və qardaşlarımızla problemi olan erməni diasporu və Ermənistan dövlətidir. Qondarma “erməni soyqırımı” iddiaları və Qarabağın işğaldan azad edilməsi istiqamətində müsbət addımlar atsalar, onlarla hər növ əməkdaşlığa hazırıq. Bu iradəni, bu cəsarəti göstərəcək erməni siyasətçiləri, Ermənistan rəhbərliyi ilə görüşməyə, danışmağa daim hazırıq. Amma ilk növbədə, Qarabağ problemi həll olunmalıdır.
Bu fikri Türkiyə Prezidenti Rəcəb Tayyib Ərdoğan qondarma “erməni soyqırımı” ilə bağlı Roma Papası Fransiskin sözlərini və Avropa Parlamentinin qətnaməsini tənqid edərkən deyib. Qardaş ölkənin dövlət başçısı bir daha bildirib ki, Türkiyə Birinci Dünya müharibəsinə dair arxivləri açıq elan edib. Əgər Ermənistanın və başqa ölkələrin də arxivləri varsa, onlar da açsınlar.
Türkiyə mediasının məlumatına görə, dövlət başçısı qeyd edib ki, qondarma “erməni soyqırımı” ilə bağlı əsassız bəyanatlar verən avropalıların məqsədi heç də ermənilərin hüquqlarını qorumaq deyil. Türkiyə dövləti bu ölkədə yaşayan ermənilərin hüquqlarını tam təmin etməklə bərabər, Ermənistandan gələnlərə də sığınacaq verib. Amma bu humanistlik Avropada yoxdur.
Sabir Şahtaxtı
AZƏRTAC-ın xüsusi müxbiri
İstanbul
Bölmənin digər xəbərləri
