Rəşad Rəsullu: Regionlarda cüdo üzrə turnirlərin təşkili bu idman növünün inkişafına təkan verir
Quba, 3 may, AZƏRTAC
Regionlarda cüdo üzrə turnirlərin təşkili bu idman növünün inkişafına təkan verir.
AZƏRTAC xəbər verir ki, bu sözləri Azərbaycan Cüdo Federasiyasının icraçı vitse-prezidenti Rəşad Rəsullu Qubada təşkil edilən yeniyetmələr arasında Avropa Kubokunun açılış mərasimindən sonra jurnalistlərə açıqlamasında deyib.
O, bu yarışın yeniyetmə cüdoçulara yaxşı təcrübə qazandıracağını bildirib: "Biz burada nəticə yox, yaxşı idmançılar qazanmaq istəyirik. Əlbəttə, medal əldə etmək önəmlidir. Amma onların inkişafı daha vacibdir".
Qurum nümayəndəsi gələcəkdə "Böyük Dəbilqə" turnirinin regionlarda keçirilib-keçirilməyəcəyi ilə bağlı da danışıb: "Bu turnirinin öz tələbləri var. Hələlik "Böyük Dəbilqə"nin regionlarda təşkil edilməsi üçün əlverişli şərait yoxdur. Bu səbəbdən Milli Gimnastika Arenasından istifadə edirik. Əlbəttə ki, biz də istərdik bu vacib yarış Azərbaycanın hansısa bölgəsində baş tutsun".
Bölmənin digər xəbərləri
