RF rəsmisi Ermənistanın hava məkanını Rusiya təyyarələri üçün bağlaması ehtimalından narahatlıq ifadə edib
Moskva, 20 iyun, AZƏRTAC
Rusiya ehtiyat edir ki, Ermənistanın Avropaya getdikcə dərinləşən inteqrasiyası fonunda Avropa İttifaqının gördüyü tədbirlərin analoqu olaraq bu respublikanın hava məkanının Rusiya təyyarələri üçün bağlanması baş verə bilər.
AZƏRTAC xəbər verir ki, bu barədə Rusiya Baş nazirinin müavini Aleksey Overçuk Sankt-Peterburq Beynəlxalq İqtisadi Forumunun sessiyasında çıxışı zamanı bildirib.
O qeyd edib: “Baxın, hazırda bizim Avropa İttifaqı ilə heç bir hava əlaqəmiz yoxdur. Avropa İttifaqı hava məkanını Rusiya təyyarələrinin üzünə bağlayıb. Ermənistan da analoji addımı atacaq? Əgər siz Avropa İttifaqına daxil olsanız, bəli, çünki Brüssel sizə hava sahəsini bağlamağı tapşıracaq. Siz də bunu edəcəksiniz, başqa çarəniz qalmayacaq. Bəs sonra?”.
Overçukun sözlərinə görə, mümkün məhdudiyyətlər həftədə yüzlərlə aviareysə təsir edəcək, həmçinin yükdaşıma sistemini sıradan çıxaracaq. Bundan əlavə, o, Yuxarı Lars keçidi vasitəsilə yükdaşımalarda mümkün çətinliklərin olacağını, burada erməni yük maşınlarının malları Rusiya və ya Belarus yük maşınlarına təhvil vermək məcburiyyətində qalacağını, daha sonra isə özlərinin geri dönəcəyini qeyd edib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
