Rumıniyada qeyri-adi elektron musiqi festivalı keçirilir
Bakı, 5 avqust, Emil Məlikov, AZƏRTAC
Rumıniyanın Kluj-Napoka şəhərində “Untold” adlı ən böyük elektron musiqi festivalı başlayıb.
AZƏRTAC xəbər verir ki, dörd günlük festivalın sonuna kimi bütün Avropadan 400 mindən çox insanın “Untold-2023”də iştirakı gözlənilir və bunun sayəsində də ev sahibliyi edən ölkəyə 80 milyon avro həcmində gəlir gələcək. Bu barədə mətbuat konfransında festivalın ictimaiyyətlə əlaqələr üzrə rəhbəri Edi Kereji məlumat verib.
“Festivalın səkkiz səhnəsində 250-dən çox rumın və xarici musiqiçilər, o cümlədən dünyanın ən yaxşı DJ-ləri David Guetta (Fransa), Armin van Buuren və Martin Garrix (Niderland), Alok (Braziliya) çıxış edəcəklər. “Untold” dünyanın ən böyük beş elektron musiqi festivalından biridir və artıq səkkizinci ildir ki, təşkil olunur. Festivalın mərkəzi parkın yaxınlığındakı əsas səhnəsinin sahəsi 900 kvadratmetrdir. Proqrama həmçinin qastronomik dequstasiyalar, makiyaj seansları, moda nümayişləri, tatu işləri, uşaqlar üçün attraksionlar daxildir”, - deyə E.Kereji vurğulayıb.
Qeyd edək ki, festivalın bağlanış mərasimi avqustun 6-da olacaq.
Bölmənin digər xəbərləri
