Rusiya qoşunları Belarusdan çıxarılıb
Kiyev, 14 iyul, AZƏRTAC
Belarusda Rusiya qoşunlarının növbəti rotasiyası aparılıb. İndi RF praktik olaraq Belarus ərazisində olan bütün hərbçilərini çıxarıb.
AZƏRTAC xəbər verir ki, bu barədə Ukraynanın Dövlət Sərhəd Xidmətinin spikeri Andrey Demçenko brifinqdə bildirib.
Onun sözlərinə görə, Ukrayna-Belarus sərhədində vəziyyət tamamilə nəzarət altında olaraq qalır. Hazırda düşmən şimaldan təkrar hücum etmək üçün hər hansı bir qruplaşmaya malik deyil.
“Buna baxmayaraq, biz vəziyyətin istənilən istiqamətdə inkişaf etməsinə hazır olmalıyıq, çünki çox təəssüf ki, Belarus Ukraynaya qarşı başlatdığı müharibədə Rusiyanı dəstəkləməkdə davam edir”, - deyə spiker vurğulayıb.
Demçenko əlavə edib ki, Rusiya qoşunları üçün Belarusdan poliqon kimi istifadə etməkdə davam edir. Lakin Rusiya Federasiyasının Belarusda şəxsi heyətinin sayı əhəmiyyətli dərəcədə azalıb.
“Xoşbəxtlikdən, Rusiya hərbçilərinin Belarus poliqonlarında sayı son zamanlar yalnız azalıb, bu yaxınlarda biz bu sayı 2 minə qədər hərbi qulluqçu səviyyəsində qeydə almışıq, lakin bu ana növbəti rotasiya aparılıb və praktik olaraq bütün Rusiya hərbçiləri Belarus ərazisindən çıxarılıb”, - deyə o qeyd edib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
