Rusiyanın idman nazirinin müavini Gəncənin MDB Oyunlarına yüksək səviyyədə hazırlığını qeyd edib
Moskva, 29 sentyabr, AZƏRTAC
Azərbaycanda keçirilən III MDB Oyunlarında qələbə qazanan rusiyalı idmançılar nağd ödənişlər alacaqlar.
AZƏRTAC xəbər verir ki, bu barədə TASS-a Rusiya idman nazirinin müavini, Azərbaycanda keçirilən III MDB Oyunlarında bu ölkənin idman nümayəndə heyətinin rəhbəri Aleksey Morozov məlumat verib. O qeyd edib ki, MDB Oyunları Rusiya Prezidenti Vladimir Putinin təşəbbüsü ilə 2019-cu ildən keçirilir: birincisi 2021-ci ildə Kazanda, ikincisi isə 2023-cü ildə Belarusda baş tutub.
Morozovun sözlərinə görə, Rusiya komandası artıq ondan çox qızıl medal qazanıb və iki medal günündən sonra 13 qızıl, iki gümüş və iki bürünc medalla komanda hesabında birinci yeri tutur. Nazir müavini vurğulayıb ki, Azərbaycandakı yarışlar Gəncə, Qəbələ, Göygöl, Mingəçevir, Xankəndi, Yevlax, Şəki də daxil olmaqla 7 şəhərdə yerləşən 12 obyektdə keçirilir və gənc idmançıların beynəlxalq səviyyədə hazırlanmasında mühüm mərhələdir.
O, həmçinin Gəncədə hazırlığın yüksək səviyyədə olduğunu qeyd edərək, bu şəhəri Bakıdan sonra Azərbaycanın ikinci idman paytaxtı adlandırıb, həmçinin avarçəkmə yarışlarının keçirildiyi Mingəçevirdəki obyektlərin əhəmiyyətini vurğulayıb. Morozov Oyunların keçirildiyi bütün şəhərlərə səfər etmək, infrastrukturla tanış olmaq və azərbaycanlı mütəxəssislərlə təcrübə mübadiləsi aparmaq niyyətində olduğunu bildirib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
