DÜNYA
Sabah Özbəkistanda prezident seçkiləri keçiriləcək
Bakı, 8 iyul, AZƏRTAC
İyulun 9-da Özbəkistanda növbədənkənar prezident seçkilərində səsvermə keçiriləcək. Bu gün isə seçkiöncəsi sükut günüdür.
AZƏRTAC xəbər verir ki, Özbəkistan Seçki Məcəlləsinin 103-cü maddəsinə əsasən, bu gündən səsvermə başa çatanadək KİV-də, o cümlədən televiziya və radioda seçki təbliğatının aparılması qadağandır. Eyni zamanda, ictimai rəy sorğularının nəticələri, səsvermə proqnozları və seçkilərlə bağlı digər araşdırmaların dərc edilməsinə də icazə verilmir.
Ötən gecədən ölkənin bütün yaşayış məntəqələrində prezidentliyə namizədlərin seçki proqramlarını əks etdirən təbliğat bannerləri, plakatlar və lövhələr yığışdırılıb.
Xatırladaq ki, aprelin 30-da Özbəkistanda konstitusiyaya düzəlişlər üzrə referendum keçirilib və prezidentin səlahiyyət müddəti beş ildən yeddi ilə qaldırılıb. Özbəkistan qanunlarına əsasən, özbək dilini bilən, son on ili ölkədə yaşayan və namizədliyi siyasi partiyalar tərəfindən irəli sürülən 35 yaşdan yuxarı bütün vətəndaşlar seçkilərdə iştirak edə bilər.
Seçkilərdə hazırkı Prezident Şavkat Mirziyoyev, Xalq Demokratik partiyasının namizədi Uluğbek İnoyatov, Ekologiya partiyasının namizədi Abduşukur Hamzayev və Ədalət Sosial Demokratiya partiyasının namizədi Roba Mahmudova mübarizə aparacaq.