Əmman, 15 dekabr, Asya Hacızadə, AZƏRTAC

Azərbaycan Respublikasının İordaniya Haşimilər Krallığındakı səfiri Sabir Ağabəyov AZƏRTAC-ın xüsusi müxbirinə müsahibəsində 2014-cü ilə yekun vuraraq deyib: “Başa çatmaqda olan ili Azərbaycan ilə İordaniya arasında ikitərəfli münasibətlərin möhkəmlənməsi baxımından çox zəngin və məhsuldar il kimi səciyyələndirmək olar”.

Onun sözlərinə görə, iki ölkə arasında qarşılıqlı əlaqələrin dinamik inkişafı əsası dövlətlərimizin rəhbərləri tərəfindən qoyulmuş dostluq və əməkdaşlıq münasibətlərinin ruhuna tam uyğundur. Səfir deyib: “Bu gün Azərbaycan ilə İordaniya arasında münasibətlər çox yüksək səviyyədədir, bu əlaqələr strateji xarakter daşıyır və yüksələn xətt üzrə inkişaf edir”.

Sabir Ağabəyovun sözlərinə görə, bu il iki ölkə arasında münasibətlər fəal inkişaf edib, imzalanmış dövlətlərarası sazişlərin həyata keçirilməsi çərçivəsində əməkdaşlıq bütün istiqamətlər üzrə davam edib. Ölkələrimiz arasında əməkdaşlığın demək olar ki, bütün sahələrini əhatə edən 40-dan çox dövlətlərarası saziş imzalanıb.

“İki dövlətin rəhbərlərinin - Prezident İlham Əliyevin və Əlahəzrət Kral II Abdullanın səmimi şəxsi münasibətləri, heç şübhəsiz, ikitərəfli münasibətlərə təkan verən başlıca amildir. Bu münasibətlər bütün səviyyələrdə qarşılıqlı fəaliyyətə şərait yaradır”, - deyən səfir vurğulayıb ki, dövlətlərimizin başçıları daim bir-biri ilə əlaqə saxlayır, bu isə ölkələrimiz və xalqlarımız arasında əməkdaşlığın genişlənməsinə və dərinləşməsinə kömək edir.

Azərbaycanın İordaniyadakı səfiri deyib: “Tərəflər bütün ilboyu siyasi və strateji qarşılıqlı əlaqələri daim dərinləşdiriblər. Məsələn, ən mühüm beynəlxalq təşkilatlarda və regional məsələlərdə sıx qarşılıqlı əlaqə saxlanıb . Bu, ölkələrimizin də tərkib hissə kimi daxil olduğu beynəlxalq münasibətlər sistemində ümumi maraqların qorunması üçün zəruridir. Bunu xatırlamaq kifayətdir ki, İordaniya 2012-ci ildə BMT Təhlükəsizlik Şurasının qeyri-daimi üzvlüyünə seçkilərdə Azərbaycanın namizədliyini dəstəkləyən ölkələrdən biri olub, Azərbaycan isə 2014-cü ildə bu təşkilatın qeyri-daimi üzvlüyünə seçkilərdə İordaniyanın namizədliyini dəstəkləyib”.

Sabir Ağabəyov deyib ki, ölkələrimiz arasında mədəni və humanitar sahələrdə intensiv əlaqələr vardır, mütəmadi olaraq müxtəlif birgə tədbirlər keçirilir, iki xalqın qarşılıqlı anlaşmasının və dostluğunun möhkəmlənməsinə stimul yaradan yüksək səviyyəli səfərlər praktikası davam edir.

Azərbaycanlı diplomat deyib: “2014-cü ildə səfirliyin bütün hakimiyyət şaxələrinin nümayəndələri ilə əlaqələri davam edib, İordaniya Senatının və Parlamentinin rəhbərliyi ilə görüşlər keçirilib, bu görüşlərdə parlamentlərarası əlaqələrin aktual məsələləri müzakirə olunub. İordaniya paytaxtının meri, turizm naziri, ailə və qadın məsələləri üzrə komitənin rəhbəri, İordaniya Universitetinin rektoru və bir sıra başqa rəsmi şəxslərlə səmərəli görüşlər olub. Bu görüşlər çərçivəsində ikitərəfli fəaliyyətimizin konkret istiqamətləri müzakirə olunub. Bu il İordaniya Senat Şurasının sədri Əbdülrauf Ravvabdeh başda olmaqla İordaniyanın nüfuzlu nümayəndə heyəti Bakıda keçirilən İkinci Cənubi Qafqaz Forumunun işində iştirak edib. Ölkə parlamentinin üzvləri NATO Parlament Assambleyasının 86-cı “ROSE-ROTH” sessiyasının, Dördüncü Bakı Beynəlxalq Humanitar Forumunun işində və digər tədbirlərdə iştirak ediblər. İordaniya nümayəndə heyətləri Bakıda keçirilən bütün mühüm beynəlxalq tədbirlərdə, o cümlədən yüksək səviyyəli “Tərəfdaşlıq siyasəti” beynəlxalq konfransında, “ADEX-2014” müdafiə sənayesi sərgisində, Beynəlxalq Antikorrupsiya Akademiyasının Üçüncü Assambleyasında, “İslam Əməkdaşlıq Təşkilatı ölkələrinin inkişafında qadınların rolu” mövzusunda Beşinci Beynəlxalq Konfransda, Gənclərin Birinci Qlobal Forumunda iştirak ediblər.

Mədəniyyət və idman tədbirləri də kənarda qalmayıb. Belə ki, Filadelfiya Universitetinin nümayəndələri “Univision” beynəlxalq mahnı müsabiqəsində iştirak ediblər, “Mən Azərbaycan haqqında nə bilirəm” inşa müsabiqəsinin qalibləri Bakıya səfər ediblər. İordaniyalı idmançılar taekvondo üzrə dünya çempionatında təmsil olunublar. Lap yaxın günlərdə şahzadə Həyya Bint əl-Hüseyn və şahzadə Əli ibn-Hüseyn başda olmaqla İordaniyanın nüfuzlu nümayəndə heyəti dekabrın 13-15-də Bakıda keçirilən Beynəlxalq Atçılıq İdmanı Federasiyasının baş Assambleyasının iclasında iştirak etmək çərçivəsində Bakıya səfər edib. Öz növbəsində, Azərbaycanın nüfuzlu nümayəndə heyəti Beynəlxalq “SOFEX-2014” müasir texnika və silah sərgisində iştirak edib. Azərbaycan Milli incəsənəti Beynəlxalq “Caraş” festivalında təmsil olunub. Bu festivalda Azərbaycan muğamının tanınmış ustaları - xalq artistləri Mələkxanım Əyyubova, Möhlət Müslümov və başqaları böyük uğurla çıxış ediblər”.

Onun sözlərinə görə “İordaniya-Azərbaycan Dostluq Cəmiyyəti” də Azərbaycan-İordaniya əlaqələrinin dərinləşməsinə sanballı töhfə verir, qarşılıqlı faydalı əməkdaşlıq və dialoqun davam etdirilməsi üçün çox mühüm məsələləri həll edir. Sabir Ağabəyov vurğulayıb: “Bununla bərabər, Azərbaycan səfirliyi ölkəmizin reallıqları, onun bütün istiqamətlərdə qazandığı uğurlar və inkişaf, habelə ölkəmizdə baş verən əlamətdar hadisələr barədə İordaniya ictimaiyyətinin məlumatlandırılmasına çox böyük diqqət yetirir. Bu, ilk növbədə xalqımız üçün əlamətdar tarixi günlərlə bağlı tədbirlər keçirilməsinə aiddir. Məsələn, bu il ümummilli lider Heydər Əliyevin doğum günündə Əmmanda onun adını daşıyan prospektdə paytaxt meri Aqil Biltacinin, parlament üzvlərinin və ictimaiyyətin iştirakı ilə keçirilən təntənəli mərasimdə Heydər Əliyev adına meydanın və fəvvarənin açılışı oldu. Dekabrın 12-də isə İordaniya və Azərbaycan ictimaiyyəti bu meydana toplaşaraq ümummilli lider Heydər Əliyevin nurlu xatirəsini ehtiramla yad etdi. Şübhəsiz, 20 Yanvar faciəsinin və Xocalı soyqırımının ildönümləri də diqqət mərkəzində olub, Azərbaycanın milli bayramları, habelə Dünya Azərbaycanlılarının Həmrəyliyi Günü qeyd edilib. İordaniya tərəfinin bu tədbirlərdə iştirakına və Azərbaycanın mövqeyini düzgün başa düşməsinə görə ona, habelə xalqımız üçün əhəmiyyətli əlamətdar hadisələri geniş işıqlandıran KİV-lərə xüsusi təşəkkürümü bildirmək istərdim”.

Diplomat bildirib ki, 2013-cü il iyunun 19-da İordaniyanın ali qanunvericilik orqanı - Senat tərəfindən qəbul edilmiş “Xocalı soyqırımının 20-ci ildönümü ilə əlaqədar qətnamə” çox mühüm sənəddir. Səfir deyib: “Qəbul edilmiş sənəddə təcavüz, insan hüquqlarının pozulması və Azərbaycanın müsəlman əhalisinə qarşı zor tətbiq edilməsi pislənilib, Ermənistan-Azərbaycan münaqişəsini beynəlxalq hüququn əsas prinsipləri və normaları, Azərbaycanın suverenliyi və ərazi bütövlüyü, habelə Ermənistan tərəfindən BMT Təhlükəsizlik Şurasının qətnamələrinin yerinə yetirilməsi çərçivəsində həllinə çağırışlar təsbit edilib. Bu qətnamədə Azərbaycanın işğal altında olan ərazilərini azad etməyə, qaçqınlara və məcburi köçkünlərə kömək etməyə çağırış da vardır. İordaniya dövlətinin bu addımı ölkələrimiz arasında səmimi tərəfdaşlıq münasibətlərinin təsdiqi kimi iki ölkənin münasibətləri tarixinə yazılacaqdır. Hazırda İordaniya parlamentində buna oxşar qətnamə qəbul edilməsi üzərində iş aparılır. Sevindirici haldır ki, İordaniya Ermənistan-Azərbaycan, Dağlıq Qarabağ münaqişəsinin beynəlxalq hüquq və ərazi bütövlüyü çərçivəsində həlli məsələsində Azərbaycanın ədalətli mövqeyini uzun illər boyu dönmədən, prinsipial və qəti şəkildə dəstəkləyir”.

Azərbaycanın İordaniyadakı səfiri Sabir Ağabəyov sonda deyib: “Bütövlükdə 2014-cü ili bizim böyük perspektivləri olan ənənəvi dostluq və qardaşlıq münasibətlərimizin möhkəmlənməsi üçün uğurlu il adlandırmaq olar”.

Asya Hacızadə

AZƏRTAC-ın xüsusi müxbiri

Əmman