AZƏRTAC-ın verdiyi xəbərə görə, bu il mayın 20-dən 23-dək Rumıniyanın paytaxtı Buxarest şəhərində Beynəlxalq Sənayeçilər və Sahibkarlar Konqresinin (BSSK) Şura iclası, həmçinin "Avropa İttifaqı sərhədlərinin genişləndiyi bir şəraitdə BSSK-da təmsil olunmuş ölkələrin iqtisadi-ticarət münasibətlərinin inkişaf xüsusiyyətləri və bu prosesdə sahibkarların milli birliklərinin rolu" mövzusunda Beynəlxalq İqtisadi Forumu keçiriləcəkdir.

Tədbirlərdə Azərbaycan iş adamından ibarət nümayəndə heyəti ilə təmsil olunacaqdır. Onlar yerli sərmayəçilərin digər ölkələrdə investisiya qoymaq imkanları, iqtisadiyyatın zəif inkişaf etmiş sahələrinin canlandırılması yolları barədə təkliflə çıxış edəcəklər.

Məqsəd Rusiya, MDB və Şərqi Avropa ölkələrinin iş adamları ilə iqtisadi-ticarət əlaqələrinin yaradılması və daha da inkişaf etdirilməsi, iqtisadiyyatın aparıcı sahələrində qabaqcıl təcrübə mübadiləsinin genişləndirilməsidir.

Forumda kiçik və orta müəssisələr arasında kooperativ əlaqələrin inkişafına yardım edilməsi, xarici və yerli maliyyə qurumlarının qeyd olunan iqtisadi fəaliyyət sahəsinə cəlb olunması və yeni investisiya imkanlarının araşdırılması məsələsi də diqqətdə saxlanılacaqdır.

Cari ilin sentyabrında BSSK-nin növbəti şura iclasının, həmçinin MDB və Şərqi Avropa ölkələrinin işgüzar dairələrinin iştirakı ilə Biznes Forumunun keçirilməsi də planlaşdırılır.