Sahil Babayev: İqtisadi qüdrətdən irəli gələn əlavə gəlirlər məhz sosial sahəyə yönəldilir
Bakı, 13 yanvar, AZƏRTAC
İstənilən dövrün qüdrəti bir neçə parametrlə ölçülür. Hərbi qüdrətlə yanaşı iqtisadi qüdrət, eyni zamanda, əhalinin rifahı hər zaman ən önəmli hesab olunan seqmentlərdir. Azərbaycan iqtisadi cəhətdən qüdrəti bir dövlətə çevrilir, inkişaf edir, həm neft, həm də qeyri-neft sektoru çox ciddi bir inkişaf yolu ilə səciyyələnir. Eyni zamanda, iqtisadi qüdrətdən irəli gələn əlavə gəlirlər məhz sosial sahəyə yönəldilir, əhalinin sosial rifahı daha da yaxşılaşdırılır. Ötən sosial paketlərə nəzərə salsaq, görəcəyik ki, hazırkı paket son beş ildə həyata keçirilən dördüncü sosial islahat paketidir. Bundan qabaq əvvəlki üç sosial islahat paketi ümumilikdə 40 faizi əhatə edib. Bu məqsədlə 6 milyard manatdan çox vəsait ayrılmışdı və onların hər birində ilk növbədə əməkhaqqı sistemi önə çəkilirdi. Birinci növbədə vətəndaşların məşğulluğu, aşağı əməkhaqqının artırılması, aşağı əməkhaqqı alanlara əlavə dəstək verilməsi yolunu tuturuq.
İkinci seqment hər zaman pensiyaçılar və onların pensiyalarının artırılmasıdır. Əgər rəqəmlərə nəzərə salsaq, 2018-ci ildə minimum əməkhaqqı Azərbaycanda 130 manat idi, bu gün artıq 345 manatdır. Minimum pensiya Azərbaycanda 110 manat idi, artıq 280 manata çatıb. Bunun üzərindən orta aylıq əməkhaqqının və orta pensiyaya da nəzərə saldıqda çox ciddi şəkildə artımları görürük. Bununla yanaşı pensiya almayan, amma sosial cəhətdən həssas olan böyük bir kəsim var: əlilliyi olan və müavinətlər alanlar, müxtəlif növ Prezident təqaüdü alanlar, şəhid ailələri, çoxuşaqlı ailələr, tələbələr və digər seqmentlər. Bu böyük kəsimdə məhz bu sosial paketlərdə hər zaman əhatə olunub.
AZƏRTAC xəbər verir ki, bu sözləri əmək və əhalinin sosial müdafiəsi naziri Sahil Babayev AzTV-də çıxışı zamanı deyib.
Nazir deyib: “Sosial müavinət və sosial təqaüdlərlə bağlı bir rəqəmi xatırlatmaq istəyirəm. Əgər 2018-ci ildə bu sahəyə ildə 3 milyon manat yönəldilibsə, artıq cari ildən bu sahəyə yönəldilən məbləğ 1 milyard 500 mindən artıqdır, təqribən beş dəfəlik bir artım olacaq. Bu, cəmi 4-5 il ərzində əldə olunan nailiyyətlərdir. 810 min nəfəri əhatə edən bu paket məhz həssas təbəqədən olanların rifahının yaxşılaşdırılmasına yönəldilir.
Digər tərəfdən ünvanlı sosial yardım proqramı həyata keçirilir. Ölkə başçısı bu proqramla bağlı tapşırıqlarını verib. Ünvanlı yardım proqramı çərçivəsində cari ildə hər ailəyə düşən dəstəyin orta hesabla 260 manat olacağını gözləyirik. Bu, özü də xüsusilə aztəminatlı ailələr üçün çox ciddi bir dəstəkdir. Bundan 60 mindən çox ailə yararlanır. Paralel olaraq özünüməşğulluq proqramları, xüsusilə aztəminatlı, əməkqabiliyyətli, lakin iş yerləri tapa bilməyən, əmək müqavilələri ilə işləməyənlər üçün yaradılmış proqramdır və bunun çərçivəsində son beş ildə 60 min ailəyə mikro və kiçik biznesini qurmağa kömək etmişik. Bu sosial islahat paketlərini təhlil edəndə görürük ki, çoxşaxəlidir. Onlar bir tərəfdən məşğulluğun stimullaşdırılmasına, eyni zamanda, da əmək qabiliyyəti məhdud olanların sosial rifahının yaxşılaşdırılmasına yönəldilib.
Bugünkü Sərəncam ən həssas təbəqədən olanların rifahının yaxşılaşdırılmasına yönəldilib. İlk növbədə bizim hər zaman ən böyük məsuliyyətimiz olan, ən böyük dəstəyə layiq olan kontingent olan şəhid ailəsi üzvləri, Birinci Qarabağ və Vətən müharibəsi əlillərinin təqaüdləri 20 faiz artırılır, eyni zamanda, müharibə əlilləri olan, müxtəlif sağlamlıq funksiyalarının pozulmasına görə I dərəcəli əlillərin təqaüdü 25 faiz artırılır, II dərəcə əlilliyi olanların təqaüdü 400 manata, III dərəcə əlilliyi olanların təqaüdü 330 manata çatdırılır. Orta rəqəmlərə nəzər salsaq, 2018-ci illə bu gün arasında olan fərq 2,7 dəfəyə çatıb, beş illik bir dövrdə təqaüdlər 3 dəfəyə yaxın artırılıb.
Xatırlatmaq istəyirəm ki, bu, yalnız həmin kateqoriyadan olanlara ödənilən Prezident təqaüdüdür. Bundan əlavə olaraq bu ailələrin hər biri ya pensiya alır, ya da pensiya stajı toplamayıblarsa, müavinətlər alırlar. Əlavə olaraq I dərəcə əlilliyi olanlara Prezident təqaüdü qismində 200 manat, onlara qulluq edənlərə 100 manat ödənilir. Yəni ümumiləşdirib baxdıqda I dərəcə əlilliyi olanlar kifayət qədər geniş sosial ödəniş mexanizmi ilə əhatə olunublar. Orqanizmin funksiyalarının pozulmasına görə verilən müavinət I dərəcə əlilliyi olanlara 270, II dərəcə əlilliyi olanlara 220, III dərəcə əlilliyi olanlara 150 manata çatdırılır”.
Nazir daha sonra deyib: “Əlavə olaraq deyim ki, son müavinət və təqaüd tələbələri də əhatə edib. 150 minə yaxın tələbənin də təqaüdləri orta hesabla 10 faiz artırılıb. Ümumi paketə nəzərə saldıqda onun 810 min nəfər əhatə etdiyini görürük. Bu məqsədlər üçün illik əlavə olaraq 310 milyon manat vəsaitin dövlət büdcəsindən ayrılması planlaşdırılır.
Uşağın doğulması və dəfnə görə müavinətlər də ciddi şəkildə artırılıb. Uşağın doğulmasına görə 500 manat, dəfnə görə müavinət 500 manat məbləğində müəyyən olunub. Bütün təqaüdlər dövrün çağırışlarına uyğun şəkildə artırılıb və bu, dövlət başçısının sosialyönümlü siyasətinin bariz nümunəsidir. Minimum əməkhaqqı və minimum pensiya ilə bağlı hədəflərimiz daha böyükdür və ardıcıl olaraq həmin hədəflərə nail olacağıq. Biz pandemiya və dünyada iqtisadi dövriyyənin ciddi şəkildə azaldığı və bir çox ölkələrin iqtisadi böhranla üzləşdiyi dövrdə də bunu davam etdirmişik”.
Bölmənin digər xəbərləri
