“Şamaxı”nın fransalı futbolçusu: İnanıram ki, cəsarət və qətiyyətlə hədəfimizə çatacağıq - MÜSAHİBƏ
Bakı, 31 yanvar, AZƏRTAC
“Şamaxı”nın fransalı futbolçusu Brahim Konate AZƏRTAC-ın suallarını cavablandırıb. Həmin müsahibəni təqdim edirik:
- Misli Premyer Liqasının ikinci dövrəsində iki oyun keçirmisiniz. Həmin matçlar barədə nə deyə bilərsiniz?
- Səfərdə “Qarabağ”a, doğma meydanda “Zirə”yə qarşı keçirdiyim oyunlarda yaxşı mübarizə apardıq. Təəssüf ki, xal qazana bilmədik. Həmin matçlarda xırda detallar hər şeyi həll etdi. Amma düşünürəm ki, komandamız yaxşı oyun nümayiş etdirir. Mövsümün ikinci yarısı üçün müsbət siqnallar var.
- Bəzi qarşılaşmalarda komanda çox yaxşı oyun nümayiş etdirsə də, yekunda üç xal qazana bilmir. Sizcə, problem nədədir?
- Dediyim kimi, xırda detallar hər şeyi həll edir. Əlbəttə ki, səhvlərimiz də olur. Məncə, əsas səbəb etdiyimiz səhvlərdir.
- Komandanız turnir cədvəlinin 8-ci pilləsində qərarlaşıb. Hazırda autsayderi üç xal qabaqlayırsınız. Bu, sizi narahat etmir?
- Liqada qalmaq üçün mübarizə aparmağın çətin olacağını bilirdik. Təhlükəli yerdən uzaqlaşmaq öz əlimizdədir. Tez bir zamanda xallar qazanmalıyıq.
- Komanda olaraq, mövsümün əvvəlində qarşıya qoyduğunuz məqsədə uyğun hərəkət edirsiniz, yoxsa hədəfləriniz dəyişib?
- Məqsədimiz dəyişməyib. Liqada qalmaq üçün çalışırıq. Komandama inanıram və ümid edirəm ki, cəsarət və qətiyyətlə hədəfimizə çatacağıq.
- “Şamaxı” XXI tur çərçivəsində bu gün səfərdə “Neftçi” ilə qarşılaşacaq. Cari mövsüm bu komanda ilə hər iki matçınız heç-heçə ilə başa çatıb. Bu seriyanın davam edəcəyini düşünürsünüz?
- Hər bir rəqibə hörmətlə yanaşırıq. Yavaş-yavaş inkişaf edirik. Bir çox oyunda xal qazanmaq şansımız olur. “Neftçi”yə qarşı da bizi gərgin və maraqlı oyun gözləyir. İnanıram ki, azarkeşlərimizi sevindirəcəyik.
- Öz çıxışınız barədə nə deyə bilərsiniz?
- Ən önəmlisi, hər oyunda komandamın qələbə qazanmasıdır. Əlbəttə, yaxşı çıxış etməklə kollektivə kömək olmaq vacibdir. Artıq “Şamaxı”da dəyişiklik var. Yeni gələn futbolçular da bura uyğunlaşıblar.
- Fransanın U-20 millisində 6 oyun keçirmisiniz. Vaxtilə Kristofer Nkunku, Markus Türam, Mussa Dembele, Seru Qirassi, Allan Sent-Maksimin və Teo Ernandes kimi tanınmış futbolçularla eyni komandada çıxış etmisiniz. O illəri necə xatırlayırsınız?
- Çox yaxşı təcrübə idi. Fransanın U-20 komandasında çıxış etdiyim üçün xoşbəxtəm. Keçmiş komanda yoldaşlarımın böyük klublarda oynadıqlarını görmək sevindiricidir.
- Həmin heyətdən hazırda dostluq etdiyiniz futbolçu varmı?
- Bəli, hazırda Almaniyanın “Borussiya Dortmund” komandasında çıxış edən Seru Qirassi çox yaxın dostumdur. Onunla tez-tez telefonla danışırıq.
Bölmənin digər xəbərləri
