Şarl Mişel: Sülh həmişə daha düzgün və daha ağıllı seçimdir
Bakı, 24 oktyabr, AZƏRTAC
Mən əvvəlki fəaliyyətim dövründə Ermənistan ilə Azərbaycan arasında dialoqun bərpası istiqamətində müxtəlif təşəbbüsləri dəstəkləmiş, həmin prosesin nə qədər mürəkkəb, nə qədər həssas olduğunu yaxından müşahidə etmişəm. Buna görə də bu gün artıq əldə olunan irəliləyişləri və hər iki tərəfin atdığı cəsarətli addımları görmək mənim üçün böyük məmnunluq doğurur. Bu, gələcəyə ümidlə baxmaq üçün ciddi əsas yaradır. Çünki əgər hər iki tərəf bu cür cəsarətli və uzaqgörən qərarlar qəbul edirsə, bu, səmimi şəkildə daha çox irəliləyiş əldə etmək istəklərinin göstəricisidir.
AZƏRTAC xəbər verir ki, bu fikirləri jurnalistlərə açıqlamasında Avropa İttifaqı Şurasının keçmiş Prezidenti Şarl Mişel bildirib.
O bildirib ki, sülh həmişə daha düzgün və daha ağıllı seçimdir. “Sülh iqtisadi inkişafın, qarşılıqlı əməkdaşlığın və regional inteqrasiyanın yeganə zəmanətidir. Bu, təkcə Azərbaycan üçün deyil, bütövlükdə region üçün həyati əhəmiyyət daşıyır. Bu istiqamətdə atılan hər addım, əldə olunan istənilən nailiyyət yeni iqtisadi imkanların, sərmayə axınının və davamlı inkişafın əsasını qoyur. Mən inanıram ki, bu proses davam edəcək və regionun gələcəyi sabitlik, tərəqqi və əməkdaşlıq ruhu üzərində qurulacaq”, - deyə o qeyd edib.
Bölmənin digər xəbərləri
