Şavkat Mirziyoyev yenidən Özbəkistan Prezidenti seçilib
Bakı, 10 iyul, AZƏRTAC
Şavkat Mirziyoyev Özbəkistanda keçirilən növbədənkənar Prezident seçkilərində 87,5 faiz səslə qələbə qazanıb.
AZƏRTAC xəbər verir ki, bu barədə Özbəkistan Mərkəzi Seçki Komissiyasının rəhbəri Zayniddin Nizamxocayev jurnalistlər üçün təşkil olunan brifinqdə deyib. “İlkin məlumata görə, Şavkat Mirziyoyevə 13 milyon 625 min 55 nəfər və ya səsvermədə iştirak edən seçicilərin 87,5 faizi səs verib”, - deyə o bildirib.
MSK-nın məlumatına görə, ölkədə seçki hüququna malik 19,5 milyon vətəndaşdan 15 milyon 671 min 405 nəfəri prezident seçkilərində iştirak edib.
Qeyd edək ki, Şavkat Mirziyoyev 1989-cu ildən ölkəyə rəhbərlik edən Özbəkistan prezidenti İslam Kərimovun ölümündən sonra 2016-cı ildə dövlət başçısı seçilib. 2021-ci ildə o, 80,12 faiz səslə növbəti prezident seçkilərinin qalibi olub.
Azərbaycan Prezidenti özbəkistanlı həmkarını prezident seçkilərində inamlı qələbəsi münasibətilə təbrik edib və bunu Şavkat Mirziyoyevin rəhbərliyi ilə Özbəkistanda həyata keçirilən siyasətə xalqın verdiyi dəstək kimi qiymətləndirib.
Bölmənin digər xəbərləri
