“Səbail” klubunda Ruslan Qafitullini Səbuhi Həsənov əvəzləyib
Bakı, 11 noyabr, AZƏRTAC
“Səbail” futbol klubunun əvəzedicilərdən ibarət komandasının baş məşqçisi Ruslan Qafitullin vəzifəsindən ayrılıb.
AZƏRTAC xəbər verir ki, bu barədə paytaxt klubunun mətbuat xidməti məlumat yayıb.
2018-ci ildən “Səbail”in U-17 və U-19 komandalarında, 2021-ci ildən isə “Səbail-2”də baş məşqçi vəzifəsində çalışan R.Qafitullinin klub ilə müqaviləsinə vaxtından əvvəl xitam verilməsinə dair qarşılıqlı razılıq əldə olunub.
“Səbail” Qafitullinə klubun kollektivi adından təşəkkür edib və gələcək karyerasında uğurlar arzulayıb.
“Səbail”in əvəzedicilərinin yeni baş məşqçisi də müəyyənləşib. Bundan sonra komandanı “Səbail-2”də köməkçi məşqçi vəzifəsində çalışan Səbuhi Həsənov çalışdıracaq. O, 2021-ci ilin dekabr ayının sonunadək komandanın baş məşqçisi vəzifəsini icra edəcək.
Qeyd edək ki, S.Həsənov 2018-ci ildən etibarən “Səbail”in U-13 və U-15 yaş qruplarında baş məşqçi, U-19 və "Səbail-2" komandalarında isə köməkçi məşqçi vəzifələrində çalışıb.
Bölmənin digər xəbərləri
