Səfir Lətif Qəndilov Ermənistanı sülh prosesini uzatmaq ideyasından imtina etməyə çağırıb
Bakı, 24 fevral, AZƏRTAC
Biz Ermənistanın 30 ildə törətdiyi əməllərə pisliklə cavab vermək istəmirik, əvəzində sülh və xeyirxahlıq təklif edirik. Lakin erməni tərəfi də yaranmış vəziyyətin sülh yolu ilə həlli prosesini uzatmağa davam etmək ideyasında israr etməkdən imtina etməlidir. Bu sözləri Qırğızıstanın “Veçerni Bişkek” qəzetinə müsahibəsində səfir Lətif Qəndilov söyləyib.
AZƏRTAC xəbər verir ki, diplomat deyib: “Azərbaycan və digər ölkələrdə Xocalı soyqırımının 31-ci ildönümünə həsr olunmuş tədbirlər keçirilir. 1992-ci il fevralın 25-dən 26-na keçən gecə Xocalı şəhərinin işğalı zamanı erməni silahlı dəstələrinin Azərbaycanın dinc əhalisini kütləvi şəkildə qətlə yetirməsi tarixə ən qanlı və amansız cinayətlərdən biri kimi keçib”.
Lətif Qəndilov bu hadisəni Qarabağ münaqişəsinin tarixində ən qanlı səhifə adlandırıb: “Erməni silahlı dəstləri Xocalı şəhərinə basqın etdilər və dinc əhaliyə qəddarcasına divan tutdular. Şəhərə hücumdan əvvəl silahlardan və ağır texnikadan güclü artilleriya atəşi açıldı”.
Azərbaycanın diplomatik nümayəndəliyinin başçısının sözlərinə görə, son bir neçə il ərzində beynəlxalq ictimaiyyət Xocalı soyqırımının tanınması istiqamətində ciddi addımlar atıb. Bu gün Bosniya və Herseqovina, Kolumbiya, Çex Respublikası, İndoneziya, Honduras, İordaniya, Meksika, Pakistan, Panama, Peru, Rumıniya, Sudan, Cibuti, Qvatemala, Paraqvay, Sloveniya və Şotlandiyanın qanunverici orqanları, habelə ABŞ-nin 24 ştatı azərbaycanlı əhaliyə qarşı cinayətin tanınması haqqında sənədlər qəbul ediblər. ATƏT Azərbaycanın ərazi bütövlüyünə və suverenliyınə hörmət etməyi tələb edib, Avropa İnsan Hüquqları Məhkəməsi özünün 22 aprel 2010-cu il tarixli qərarında Xocalı hadisələrini “müharibə cinayəti və insanlıq əleyhinə cinayətə” bərabər tutub.
Diplomatın sözlərinə görə, aparıcı KİV-lər erməni silahlıların müdafiəsiz əhaliyə qarşı silahlı hücumu, insanlığa zidd əməlləri və qəddarlığından bəhs edib.
O qeyd edib ki, Xocalı sakinləri 30 il ərzində münaqişənin ədalətli həllini gözləyiblər. Azərbaycanın məğrur və müdrik xalqı yalnız Ermənistanın növbəti təxribatından sonra - 44 günlük müharibə ərzində bunu həyata keçir bilib. Hazırkı şəraitə nəzər salarkən, bütün dünya işğaldan azad edilmiş Azərbaycan ərazilərində erməni işğalçılarının timsalında milli dözümsüzlük və barışmazlığın nə olduğunu gördü.
Səfir əlavə edib: “Belə bir sual meydana çıxır: niyə XX əsrin sonlarında Holokost, Xatın, Babi Yar kimi faciələr yaşamış bəşəriyyət daha bir qəddar faciənin - Xocalı soyqırımının baş verməsinə izn verdi? Sualın cavabı aydındır: ikili standartlar və başqasının faciəsinə etinasızlıq. Ermənistana təzyiq etmək istəməmək və həqiqətin qarşısında susmaq beş verənlərə şərait yaratdı”.
L.Qəndilov vurğulayıb ki, törədilən bu faciəyə baxmayaraq, Azərbaycan xalqı müharibədən ötən son iki il ərzində Ermənistana sülh sazişi imzalamağı təklif edib. O əlavə edib: ”Lakin erməni tərəfi dəfələrlə bu təklifdən yayınıb, sözdə Laçın dəhlizinin “blokadasından” bəhs etməyə davam edir. Həm də buna baxmayaraq ki, il yarım ərzində Azərbaycan Ermənistanla Xankəndini birləşdirən təqribən 32 kilometr uzunluğunda üçzolaqlı müasir yol tikib. Biz Ermənistanın özündə bu əsas yol ilə birləşən 4 kilometrlik əlavə yol inşa etmişik. Tez-tez Laçın dəhlizini xatırladan Ermənistan 2020-ci il noyabrın 10-da imzalanmış Bəyanatın 9-cu maddəsini unudur. Orada Azərbaycanı Naxçıvanla birləşdirən kommunikasiyaların, yəni Zəngəzur dəhlizinin açılması zərurəti təsbit olunub. Laçın yolu ətrafında spekulyasiya və təxribatlar davam edir. Ermənilər 30 il ərzində işğal olunmuş torpaqları azad etməyərək, dünya ictimaiyyətinə yanlış məlumat verirdilər, indi isə Azərbaycanın təbii ehtiyatlarının qanunsuz istismarını və ekosidin nəticələrini gizlətmək istəyirlər.
Bölmənin digər xəbərləri
