Səfirlik 34 Azərbaycan vətəndaşını Moskvadan Bakıya yola salıb
Moskva, 22 mart, AZƏRTAC
Martın 22-də 34 Azərbaycan vətəndaşı Rusiyanın “Aeroflot” aviaşirkətinin təyyarəsi ilə Moskvanın A.S.Puşkin adına Şeremetyovo beynəlxalq hava limanından Bakıya yola salınıb.
Bu barədə AZƏRTAC-a ölkəmizin Moskvadakı səfirliyindən məlumat veriblər. Qeyd edilib ki, bu, səfirliyin və “Azərbaycan Hava Yolları” QSC-nin rəhbərliyinin müdaxiləsi əsasında mümkün olub.
Səfirlikdən onu da bildiriblər ki, yaranmış məlum vəziyyətlə əlaqədar soydaşlarımızın Vətənə yola salınması məsələsi səfirliyin ciddi nəzarəti altındadır. Səfirlik “AZAL” aviaşirkətinin Rusiyadakı nümayəndəliyi ilə birgə fəaliyyət göstərir.
Azərbaycana getmək istəyən soydaşlarımızın səfirliyin “qaynar xətlərinə” (+7977 442 2954, +7977 442 2964) və ya “AZAL”ın Moskvadakı nümayəndəliyinə (+7499 243 3302, +7499 243 3307, +7495 660 1777) zəng etmələri xahiş edilir. Ölkəmizə qayıtmaq istəyən soydaşlarımıza “AZAL” aviaşirkətinin xidmətlərindən yararlanmaq məsləhət görülür. Belə ki, bu gərgin vəziyyətdə səfirliyin digər aviaşirkətlərlə əməkdaşlıq imkanları olduqca məhduddur.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
