REGİONLAR
Şəhid anası: Allahdan ən böyük arzum oğlumun meyitinin tapılması idi
![](/files/galleryphoto/2023/2/1200x630/16928185582600943192_1200x630.jpg)
![](/files/galleryphoto/2023/2/1200x630/1692818558300132963_1200x630.jpg)
![](/files/galleryphoto/2023/2/1200x630/1692818558612052004_1200x630.jpg)
![](/files/galleryphoto/2023/2/1200x630/1692818558898245105_1200x630.jpg)
![](/files/galleryphoto/2023/2/1200x630/16928185583589554600_1200x630.jpg)
![](/files/galleryphoto/2023/2/1200x630/1692818558741410573_1200x630.jpg)
![](/files/galleryphoto/2023/2/1200x630/1692818558692742629_1200x630.jpg)
![](/files/galleryphoto/2023/2/1200x630/16928185582770733923_1200x630.jpg)
![](/files/galleryphoto/2023/2/1200x630/1692818558559429912_1200x630.jpg)
![](/files/galleryphoto/2023/2/1200x630/16928185581912713505_1200x630.jpg)
Şamaxı, 23 avqust, Rəşad Türk¬oğlu, AZƏRTAC
Otuz bir il idi gözüm yolda qalmışdı, amma bir gün oğlumdan xəbər tutacağıma inanırdım.
AZƏRTAC xəbər verir ki, bu sözləri Daşaltı kəndində itkin düşən və cəsədinin qalıqları 31 il sonra tapılaraq bu gün Şamaxının Göylər kəndində dəfn olunan şəhid Baba Mikayılovun anası Mələksuma Mikayılova deyib.
“Allahdan arzum idi ki, oğlumun meyiti də olsa tapılsın, onu dəfn edək. Var olsun Prezidentimiz, şükür olsun ki, mən ölmədən bu günü gördüm. O vaxtı orduya yazılmasından da xəbərimiz olmadı, bir dəfə yaralanıb gəldi, yalvardım ki, ay oğul, getmə. Mənə dedi ki, “ana, mən silahdaşlarımı, Vətənimizi darda qoya bilmərəm", - deyə şəhidin anası bildirib.
Qardaşı cəbhəyə yola düşəndə 13 yaşında olan bacısı Dilarə Mikayılova deyib ki, ailənin son beşiyi olduğu üçün Baba hamıdan çox onu istəyirdi: "Biz bacı-qardaş olmaqla yanaşı, həm də yaxın dost idik. Onun itkin düşməsi məni çox kədərləndirdi, bu günə qədər də hər yerdə onu gözlərim axtarırdı. Bu gün isə qardaşımın cənazəsini qarşıladıq. Bilmirik ki, qardaşımın meyitinin tapılmasına sevinək, yoxsa kədərlənək. Sağ olsun Prezidentimiz, yaşasın Azərbaycan əsgəri, onların sayəsində gözlərimiz yoldan yığıldı. İnanıram ki, indi qardaşımın da ruhu şaddır, biz də rahatıq. Atamın bu günü görə bilmədiyi üçün pis oluram, amma bir də o var ki, indi qardaşım da atamızın yanında uyuyacaq”.
Qeyd edək ki, Şamaxı rayon Göylər kənd sakini Baba Mikayılov 1969-cu il sentyabrın 22-də anadan olub. Hərbi xidmətini başa vurduqdan sonra o, Neft Daşlarında işə düzəlib.1991-ci ildə ermənilər torpaqlarımızı işğal etdiyi zaman o, könüllü olaraq ordu sıralarına qatılıb. Müxtəlif ərazilərdə döyüş əməliyyatlarında iştirak edən Baba Mikayılovun son döyüşləri 1992-ci il yanvarın 26-da Şuşanın Daşaltı kəndi yaxınlığında olub.
Baba Mikayılovun itkin düşməsindən düz 31 il sonra onun meyitinin yeri aşkar edilib. İtkin düşən və aşkarlanmış meyit qalıqlarının eyniləşdirilməsi prosesində şəxsiyyəti müəyyən olunan Baba Mikayılovun nəşi bu gün doğulub boya-başa çatdığı Şamaxının Göylər kəndində torpağa tapşırılıb.