ŞƏKİDƏ TURİZMİN İNKİŞAFI ÜÇÜN GENİŞ İMKANLAR VAR
İcra hakimiyyətindən AZƏRTAC-ın müxbirinə bildirmişlər ki, müzakirələrdə Şəkidə kurort-sanatoriya təsərrüfatının və turizmin inkişaf etdirilməsinin yerli gəlirlərin dinamik artımı ilə yanaşı, bir sıra xidmət sahələrinin və sənətkarlığın da dirçəldilməsinə şərait yaradacağı vurğulanmışdır. Turistlərin bu bölgəyə axınını gücləndirmək üçün ilk növbədə, şəhərin Yuxarıbaş məhəlləsində yerləşən istirahət zonasının bərpa edilməsi, “Çələngəz” istirahət zonasında turistlər üçün yaşayış evlərinin tikilməsi, “Marxal” və “Mustafa bəyin bağı” istirahət zonalarında mövcud binaların müasir tələblərə uyğun bərpası, “Gələrsən-görərsən” istirahət zonasına gedən yolun təmiri xüsusilə vacibdir.
XIX əsrdə yerli tacirlər tərəfindən inşa edilən və İpək yolu üzərində ən böyük dayanacaqlardan və ticarət mərkəzlərindən biri olan, 192 yaşayış otağına və yardımçı binalara malik Aşağı Karvansarayın yenidən qurularaq istifadəyə verilməsi turizmin və turizm ticarətinin inkişafına böyük təsir göstərə bilər.
İclasda qeyd olunmuşdur ki, Şəkidə turizmin inkişafı yerli sənətkarlıqla və digər sahələrlə məşğul olan 4 min nəfərin də işlə təmin edilməsinə kömək göstərəcəkdir.
