İQTİSADİYYAT
Sektor müdiri: Ötən il yeni prioritet fəaliyyət istiqamətlərinin icrası təmin edilib
![Sektor müdiri: Ötən il yeni prioritet fəaliyyət istiqamətlərinin icrası təmin edilib](/files/2024/1/1200x630/17097959604834327488_1200x630.jpg)
Bakı, 7 mart, AZƏRTAC
Ötən il Biznes mühiti və beynəlxalq reytinqlər üzrə Komissiyanın mandatına uyğun olaraq, aidiyyəti dövlət qurumlarının təşəbbüsü ilə prioritet istiqamətlərdə 5 yeni işçi qrup və 2 yeni əlaqələndirmə qrupu yaradılıb. Ümumilikdə, komissiya çərçivəsində 25 işçi qrup, 2 əlaqələndirmə qrupu və spesifik sahələr (ekoloji nəqliyyat, elmi potensial, sərhəddə ticarət və ESG) üzrə 4 alt qrup fəaliyyət göstərir və komissiyanın işçi qruplarının üzvlərinin ümumi sayı 660-dan çoxdur.
AZƏRTAC xəbər verir ki, bu sözləri Azərbaycan Respublikası Prezidentinin Administrasiyasının İqtisadi siyasət və sənaye məsələləri şöbəsinin sektor müdiri Vüsal Şıxəliyev “Biznes mühitinin yaxşılaşdırılması üzrə iqtisadi islahatlar və müasir çağırışlar” mövzusundakı konfransda deyib.
V.Şıxəliyev qeyd edib ki, hesabat ilində müasir çağırışlar nəzərə alınmaqla yeni prioritet fəaliyyət istiqamətləri müəyyənləşdirilib və icrası təmin edilib. Komissiya çərçivəsində müvafiq dövlət qurumlarının rəhbərliyi altında 30-dan çox normativ hüquqi aktın layihəsi hazırlanaraq aidiyyəti üzrə təqdim edilib, biznes mühitinin əlverişliliyinin artırılmasına xidmət edən mühüm qanunvericilik sənədləri qəbul olunub. Komissiya çərçivəsində daha səmərəli və çevik koordinasiya/kommunikasiyanın təşkili, eləcə də inklüzivliyin və vahid sinerjinin yaradılması hədəflənir. O bildirib ki, biznes mühitinin daha da yaxşılaşdırılması və əlverişliliyinin artırılması üzrə əsas prioritetlər diqqət mərkəzindədir.
“Biznes startapları üçün rəqəmsal dövlət xidmətlərinin dairəsinin genişləndirilməsi, “yaşıl binalar” və “yaşıl tikinti” ilə bağlı norma və standartların hazırlanması və qəbulu, daşınmaz əmlakın ilkin qeydiyyatı üzrə elektron sistemin yaradılması, elektrik şəbəkəsinə qoşulma üzrə onlayn müraciət sisteminin əhatə dairəsinin genişləndirilməsi, su şəbəkəsinə qoşulma üzrə tələb olunan prosedurların, müddətin və xərclərin azaldılması və "Bir pəncərə" prinsipinin tətbiqi, internetə qoşulma və internet infrastrukturu üzrə təkmilləşmələrin aparılması, Dövlət məşğulluq xidmətlərinin rəqəmsallaşma səviyyəsinin artırılması, “Yaşıl maliyyələşmə" prinsiplərinin həyata keçirilməsi və bank sektorunda ESG meyarlarının tətbiqinin təşviq olunması, malların beynəlxalq ticarətinin asanlaşdırılması üçün dövlət xidmətlərinin keyfiyyətinin yüksəldilməsi, vergi inzibatçılığı sahəsində yeni elektron xidmətlərin yaradılması, kommersiya məhkəmə çəkişmələrində dövlət xidmətlərinin adekvatlığının təmin olunması və məhkəmə qərarlarının icra prosesinin sürətləndirilməsi, bazar rəqabətini təşviq edən qaydaların tətbiqi, müflisləşmə icraatının tam avtomatlaşdırılması və icraat haqqında qaydaların keyfiyyətinin yüksəldilməsi əsas istiqamətlərdəndir”,- deyə V.Şıxəliyev diqqətə çatdırıb.