SEL VƏ DAŞQINLARA QARŞI HAZIRLIQ İŞLƏRİ DAVAM ETDİRİLİR
İsmayıllı rayon suvarma sistemləri idarəsinin rəisi Fazil Həsənov AZƏRTAC-ın müxbirinə bildirmişdir ki, son 5-6 ayda sel və daşqınların daha çox təhlükə törətdiyi Göyçay çayında 20 min kubmetr, Ağsuçayda 15 min kubmetr, Talıstan çayında 114 min kubmetr təmizləmə və bərpa işləri görülmüş və buna ümumən 59 milyon manat vəsait xərclənmişdir. Talıstan çayında bu məqsqədlə əlavə olaraq 90,5 milyon manatlıq 483 min kubmetr daş-beton işləri yerinə yetirilmişdir.
Respublika Meliorasiya və Su Təsərrüfatı Komitəsi daha təhlükəli ərazidə yerləşən Sumağallı kəndini sel və daşqınlardan mühafizə məqsədilə 1000 kubmetr daş və betondan qoruyucu bənd çəkdirmişdir.
Hazırda bu istiqamətdə tədbirlər həyata keçirilməkdədir. Göyçay çayının təhlükə törətdiyi Buynuz kəndinin, habelə Talıstan çayının təhlükəyə məruz qoyduğu İsmayıllı şəhərinin mühafizəsi üçün üst-üstə 2000 kubmetrlik daş-beton bəndlərin çəkilməsi planlaşdırılır.
Nəinki yaşayış məntəqələrinin, habelə əkin sahələrinin mühafizəsi işlərinə 3 ədəd “T-130” markalı və 3 ədəd “DT-75” markalı buldozerlər, 3 ədəd 0,25 tutumlu və 1 ədəd 0,65 tutumlu ekskavator, xeyli canlı qüvvə ayrılmışdır.
