Sentyabrın 9-da Kür çayının deltasında təmizlik aksiyası keçiriləcək
Bakı, 5 sentyabr, AZƏRTAC
Aparılan tədqiqatlar göstərir ki, Kür çayında, eləcə də Xəzər dənizində balıq artımının kəskin azalmasının əsas səbəblərindən biri çaylara atılan məişət və sənaye tullantılarının çoxluğudur. Bunun qarşısını isə birgə səylərlə almaq olar. IDEA İctimai Birliyi məhz belə bir təşəbbüslə çıxış edib.
Birlikdən AZƏRTAC-a bildiriblər ki, sentyabrın 9-da Neftçala rayonu ərazisində Kür çayının deltasında yerli sakinlərin iştirakı ilə təmizlik aksiyası təşkil ediləcək. Həmin təşəbbüsə qoşulanlar açıq havada gözəl, əyləncəli və faydalı bir gün keçirəcəklər.
Neftçala rayonunda və yaxın ərazilərdə yaşayan fəal və təbiətsevər gənclər (+994 12) 497-63-16 telefon nömrəsi ilə əlaqə saxlamaqla aksiyaya qoşula və ətraflı məlumat əldə edə bilərlər.
Bölmənin digər xəbərləri
