Serbiya İordaniyada səfirlik açacaq
Belqrad, 4 aprel, AZƏRTAC
Serbiya İordaniyada səfirlik açmağı nəzərdən keçirir.
AZƏRTAC xəbər verir ki, bunu Serbiya Prezidenti Aleksandar Vuçiç deyib.
O bildirib ki, İordaniya 2027-ci il mayın 15-dən avqustun 15-dək Belqradın ev sahibliyi edəcəyi “Expo 2027” ixtisaslaşdırılmış sərgisində iştirakını təsdiqləyib.
Ölkə gündəmindən danışan Aleksandar Vuçiç əlavə edib ki, aprelin 5-də ictimaiyyətə müraciət edəcək və yeni Baş nazirin adını açıqlayacaq.
Qeyd edək ki, Serbiya Prezidenti bu həftə ərzində Baş nazir vəzifəsinə təyinatla bağlı parlamentdə təmsil olunan siyasi partiyalarla məsləhətləşmələr aparıb.
Serbiya Milli Assambleyası martın 19-da Baş nazir Milos Vuçeviç və hökumətin istefasını təsdiqləyib. Yeni hökumətin formalaşdırılması üçün verilən müddət aprelin 18-də başa çatır.
Milos Vuçeviç və bir neçə nazir keçən il noyabrın 1-də Novi Sad şəhərindəki dəmir yolu vağzalında 15 nəfərin öldüyü, 2 nəfərin ağır yaralandığı qəzaya görə tələbələrin keçirdiyi etiraz aksiyalarından sonra istefa vermişdilər.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
