Serbiyada qayıq qəzası zamanı itkin düşənlərin axtarışı davam edir
Belqrad, 23 avqust, AZƏRTAC
Serbiyada qeyri-qanuni mühacirləri daşıyan qayığın Drina çayında batması nəticəsində itkin düşənlərin axtarışları davam etdirilir.
AZƏRTAC xəbər verir ki, axtarış-xilasetmə əməliyyatlarına Serbiya ilə Bosniya və Herseqovinanın müvafiq qurumları cəlb olunub.
Ötən gün səhər saatlarında Serbiyadan Bosniya və Herseqovinaya keçməyə çalışan qayıqda azı 30 suriyalı miqrant olub. Onlardan 18-i sahilə çıxa bilib, biri körpə uşaq olmaqla, 10 nəfərin cəsədi tapılıb. Həlak olanların əksəriyyəti qadın və uşaqlardır.
Rəsmilər itkin düşənlərin sayının çox ola biləcəyindən narahatdırlar.
Qeyd edək ki, Balkan regionu Qərbi Avropa ölkələrinə keçməyə çalışan qeyri-qanuni mühacirlərin üstünlük verdiyi marşrutdur. Təkcə 2023-cü ildə Drina çayında ən azı 30 miqrantın cəsədi tapılıb.
Avropa sərhədlərinin mühafizəsi agentliyinin (Frontex) məlumatına görə, son dövrlərdə Balkan marşrutunda qeyri-qanuni sərhəd keçidlərinin sayında 75 faiz azalma müşahidə olunub. Bu da Avropa İttifaqına gedən əsas miqrasiya marşrutları arasında ən böyük azalmadır.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
