Serbiyada Ümummilli Liderin əziz xatirəsi ehtiramla yad olunub
Belqrad, 12 dekabr, AZƏRTAC
Dekabrın 12-də Azərbaycan xalqının Ümummilli Lideri Heydər Əliyevin vəfatının 19-cu ildönümü ilə əlaqədar Serbiyanın paytaxtı Belqrad şəhərində anım mərasimi keçirilib.
AZƏRTAC xəbər verir ki, mərasimdə Azərbaycanın Serbiyadakı səfirliyinin əməkdaşları və bu ölkədə yaşayan, çalışan və təhsil alan həmvətənlərimiz iştirak ediblər. Tədbir iştirakçıları Taşmaydan parkına gələrək görkəmli siyasi və dövlət xadimi Heydər Əliyevin abidəsi önünə gül dəstələri qoyub və Ulu Öndərimizin əziz xatirəsini bir dəqiqəlik sükutla yad ediblər.
Səfir Kamil Xasiyev müstəqil Azərbaycan dövlətinin memarı və qurucusu Ulu Öndər Heydər Əliyevin müstəqilliyimizin sarılmaz olmasında, Ordumuzun qüdrətlənməsindəki əməyinin danılmaz olduğunu bildirib.
Daha sonra tədbir iştirakçıları həmin parkda ucaldılmış görkəmli serb yazıçısı Milorad Paviçin heykəlini və 1999-cu ildə Belqrad şəhərinin bombalanması zamanı parkda həlak olmuş uşaqların xatirəsinə ucaldılmış “Biz sadəcə uşaqlar idik” abidəsini ziyarət edib, hər iki abidənin önünə gül dəstələri qoyublar.
Tədbir Azərbaycanın Serbiyadakı səfirliyində davam etdirilib.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
