Serbiyalı həndbolçu: Ustad dərsləri gənclərə idmandan əlavə, digər sahələrdə də fayda verəcək
Bakı, 12 avqust, AZƏRTAC
On yeddi ildir peşəkar səviyyədə həndbol oynayıram. Belə ustad dərslərinin gənclərə idmandan əlavə, digər sahələrdə də faydası olacaq. Yaxşı idmançı kimi yetişmək üçün idman zalından kənarda da çox şeylərdən anlayışın olmalıdır. Pozitiv düşüncə, əzmkarlıq idmançıları uğura aparacaq.
AZƏRTAC xəbər verir ki, bu sözləri tanınmış serbiyalı həndbolçu Andrea Lekiç deyib.
Avropa Həndbol Federasiyasının təşəbbüsü ilə U-17 komandalara ustad dərsi keçən Andrea Lekiç bilik və bacarıqlarını yarışın ən yaxşı oyunçuları ilə bölüşüb. Hazırda Macarıstanın “Ferentsvaroş” klubunun şərəfini qoruyan 36 yaşlı tanınmış idmançı artıq üç ildir ustad dərsləri keçdiyini vurğulayıb.
Daha sonra Avropa Həndbol Federasiyasının nümayəndəsi Stefan Lonqen on yeddi yaşadək qızlar arasında keçirilən Avropa çempionatı barədə öz düşüncələrini bölüşüb.
O deyib: “Oyunlar çox maraqlı keçir, qızlar əllərindən gələni edirlər. Azərbaycana ilk səfərimdir. Bakı şəhərini, xüsusilə İçərişəhəri çox bəyəndim. Bugünkü ustad dərsində Andrea Lekiç qızlara lazımi tövsiyələr verdi. Mən də öz növbəmdə tövsiyə edərdim ki, qızlar öz güclərinə inansınlar. Bu zaman yaxşı nəticələr əldə etmək daha asan olar”.
Bölmənin digər xəbərləri
