SEYMUR MƏMMƏDOV BİLYARD ÜZRƏ AVROPA KUBOKUNUNTƏSNİFAT MƏRHƏLƏSİNİ UĞURLA BAŞA VURMUŞDUR

31.01.2006 [23:19]
Çap et
A⁺ A^-

AZƏRTAC xəbər verir ki, Rusiyanın Sankt-Peterburq şəhərində bilyardın piramida növü üzrə Avropa kubokunun birinci təsnifat mərhələsinə yekun vurulmuşdur. Turnirdə ölkəmizi 4 bilyard ustası təmsil etmişdir.

Onların arasında yalnız ölkə çempionu Seymur Məmmədov 192 nəfər kişi iştirakçı arasında yüksək nəticə göstərib, səkkizdəbir finala vəsiqə qazansa da, bu mərhələdə məğlub olaraq, 9-cu yerlə kifayətlənməli olmuşdur. Qeyd edək ki, onaltıdabir finalda ikiqat dünya çempionu qazaxıstanlı Kanibek Saqındıqovu məğlub edən S.Məmmədov rusiyalı idmançı ilə növbəti qarşılaşmada 4:2 hesabı ilə irəlidə olsa da, üstünlüyünü qoruyub saxlaya bilməmişdir.

Reqlamentə əsasən, Avropa kubokunun il ərzində keçiriləcək beş təsnifat mərhələsinin yarışlarında ən yüksək nəticə göstərmiş 32 nəfər idmançı finala vəsiqə qazanacaqdır.

Yarışın ikinci təsnifat mərhələsinin martda Belarusun paytaxtı Minskdə keçirilməsi nəzərdə tutulmuşdur.