Silahlı Qüvvələr Günü Varşavada qeyd olunub
Vyana, 26 iyun, AZƏRTAC
Azərbaycanın Polşadakı səfirliyinin təşkilatçılığı ilə Varşavada Azərbaycan Silahlı Qüvvələrinin yaradılmasının 107-ci ildönümü münasibətilə tədbir keçirilib.
AZƏRTAC xəbər verir ki, tədbirdə Polşa-Azərbaycan parlament qrupunun sədri və üzvləri, xarici işlər və milli müdafiə nazirliklərinin əməkdaşları, Varşavanın Cənubi Praqa rayonunun merinin müavini və əməkdaşları, Hüquq və Ədalət Partiyasının təmsilçiləri, Müsəlman Dini Birliyinin nümayəndələri, yerli ziyalılar, Azərbaycan icmasının üzvləri və səfirliyin əməkdaşları iştirak ediblər.
Tədbirin təqdimatında Silahlı Qüvvələr Gününün tarixindən bəhs olunub, müasir Azərbaycan ordusunun formalaşması və inkişafında Azərbaycan xalqının Ümummilli Lideri Heydər Əliyev və Prezident İlham Əliyevin rolu vurğulanıb. Silahlı Qüvvələr Gününün Azərbaycanda genişmiqyaslı ictimai tədbirlər, o cümlədən hərbi paradlar, açıq səma altında şənliklər, mədəni-kütləvi tədbirlər, konsertlər, şəhid olmuş əsgərlərin abidələri önünə əklil qoyma mərasimləri ilə qeyd olunduğu bildirilib.
Səfir Nərgiz Qurbanova çıxışında Azərbaycan Ordusunun yaranması tarixindən bəhs edib, 1998-ci ildə Azərbaycan xalqının Ümummilli Lideri Heydər Əliyevin 26 iyun tarixini Silahlı Qüvvələr Günü elan etdiyini diqqətə çatdırıb. Ümummilli Liderin peşəkar, bacarıqlı və strateji yönümlü Azərbaycan Ordusunun formalaşmasındakı mühüm rolu, xüsusilə “Cəmşid Naxçıvanski adına Hərbi Məktəbi”n əsasının qoyulması, müstəqillik illərində xüsusi təyinatlıların yaradılması, hərbi təhsildə islahatların aparılması və müdafiənin modernləşdirilməsi haqqında məlumat verilib.
Azərbaycan Respublikasının Prezidenti, Silahlı Qüvvələrinin Ali Baş Komandanı İlham Əliyevin misilsiz səyləri və strateji qərarları nəticəsində silahlı qüvvələrimiz daha da möhkəmlənməsi, müasir və ən güclü ordulardan biri olması vurğulanıb. Səfir Azərbaycan xalqının 30 illik həsrətinə son qoyulması, ölkəmizin ərazi bütövlüyü və suverenliyinin bərpa edilməsində Müzəffər Ali Baş Komandanın azad iradəsini və rəşadətli Azərbaycan Ordusunun şücaətini ayrıca qeyd edib. Bildirilib ki, Azərbaycan xalqı və ordusunun əzmi, birliyi, gücü nəinki öz əzəli torpaqlarımıza Zəfər bayrağı ilə qayıtmağımızı təmin edib, eyni zamanda bölgədə sülh, sabitlik, təhlükəsizlik və regional əməkdaşlıq üçün unikal imkanlar yaradıb.
1918-1920-ci illərdə Azərbaycan Xalq Cümhuriyyəti (AXC) ordusunda xidmət etmiş digər polyak zabitlərdən söhbət açan səfir onların həm döyüş əməliyyatlarına, həm də hərbi maddi-texniki təchizata, habelə Bakıda artilleriya mərmiləri istehsal edən müəssisənin yaradılmasına töhfələrini qeyd edib. Onların bolşevik qüvvələrinə qarşı Gəncə silahlı üsyanında və Azərbaycanın digər ərazilərində gedən döyüşlərdə igidliklə vuruşaraq gənc respublikanı müdafiə etdikləri qeyd olunub.
Səfirin ardınca Varşavanın Praqa-Poludne rayonunun merinin müavini Bojena Pşıbışevska çıxış edərək Azərbaycan ilə Polşa arasındakı hazırkı əlaqələrə diqqət yetirib, ölkəmizin Ukraynaya humanitar yardımlar göstərməsini və Avropanın enerji təhlükəsizliyindəki rolunu qeyd edib.
Polşa-Azərbaycan parlament qrupunun sədri Pşemıslav Vitek çıxışında Silahlı Qüvvələri Gününün Azərbaycan xalqı üçün önəminə diqqət yetirib və otaq qəhrəmanlarımızın tarixini rolunu vurğulayıb.
Hüquq və Ədalət Partiyasının Parlament qrupunun vitse-prezidenti və katibi Barbara Bartuş isə Polşa ilə Azərbaycan arasında dostluğun çox dərin və ortaq münasibəti nümayiş etdirdiyini qeyd edib. O, ölkələrimizin müstəqilliyi və suverenliyi üçün vətəndaşların canlarını qurban verməkdən çəkinmədiklərinə diqqət yetirərək birgə qəhrəmanlarımıza ehtiramını ifadə edib.
Rəsmi çıxışların ardınca Varşava qarnizonunun müşayiətində Azərbaycanın Polşadakı səfirliyi, Praqa-Połudne rayonun meriyası, Polşa-Azərbaycan parlament qrupu, Hüquq və Ədalət Partiyasının Parlament Qrupu, Polşa Respublikasının Müsəlman Dini Birliyi, Milli Xatirə İnstitutu, Polşa Tatar İttifaqı və s. adından Yuzef Polinski parkında azərbaycanlı polkovnik Vəli bəy Yadigar və general Maçey Sulkeviçin xatirəsinə ucaldılmış abidənin önünə əklil və gül dəstələri qoyulub.
Tədbir çərçivəsində “İRS” jurnalının Azərbaycan maddi-mədəni irsi, qədim tarixi, müasir inkişafı, ədəbiyyatı, azad edilmiş ərazilərdəki quruculuq işləri, turizm imkanlarına həsr olunmuş ingilisdilli buraxılışları qonaqların diqqətinə təqdim olunub.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
