Silahlı Qüvvələrdə ümumordu iməciliyi keçirilir
Bakı, 2 may, AZƏRTAC
Azərbaycan xalqının ümummilli lideri Heydər Əliyevin anadan olmasının 92-ci ildönümü və Böyük Vətən müharibəsində Qələbənin 70 illik yubileyi münasibətilə müdafiə naziri, general-polkovnik Zakir Həsənovun əmrinə əsasən mayın 2-də Silahlı Qüvvələrdə ümumordu iməciliyi keçirilir.
Müdafiə Nazirliyinin mətbuat xidmətindən AZƏRTAC-a bildiriblər ki, təsdiq edilmiş plana əsasən şəxsi heyət ümummilli liderimiz Heydər Əliyevin abidələrinin yerləşdiyi ərazilərdə, guşələrdə abadlıq və tərtibat işləri aparacaq, yaşıllıqlara qulluq göstərəcək, müxtəlif növ ağac və gül kolları əkəcək, digər tədbirlər həyata keçiriləcək.
Yüksək bayram əhval-ruhiyyəsində hərbi orkestrlərin çıxışları ilə müşayiət olunan ümumordu iməciliyində Böyük Vətən müharibəsində həlak olanların xatirəsinə ucaldılmış abidələrin, Sovet İttifaqı qəhrəmanlarının məzarlarının ətrafında da abadlıq-təmizlik işləri görüləcək.
Bölmənin digər xəbərləri
