Silahlı Qüvvələrin 100 illiyinə həsr olunmuş atıcılıq turnirinin final mərhələsi keçirilib
Bakı, 11 iyun, AZƏRTAC
Səfərbərlik və Hərbi Xidmətə Çağırış üzrə Dövlət Xidmətinin Azərbaycan Silahlı Qüvvələrinin 100 illiyi münasibətilə Bakıdakı orta ümumtəhsil məktəblərinin şagirdləri arasında təşkil etdiyi atıcılıq turnirinin final mərhələsi keçirilib. Atıcılıq turnirinin birinci mərhələsində paytaxt rayonlarının orta ümumtəhsil məktəblərinin şagirdləri yarışıblar. Nəticədə hər rayondan bir məktəbin komandası finala vəsiqə qazanıb.
AZƏRTAC xəbər verir ki, turnirin final mərhələsi iyunun 16-da Xidmətin tabeliyində olan “Hərbi Vətənpərvərlik və Mütəxəssis Hazırlığı Mərkəzi” Məhdud Məsuliyyətli Cəmiyyətinin Sabunçu rayon filialında təşkil olunub.
Tədbirdə Səfərbərlik və Hərbi Xidmətə Çağırış üzrə Dövlət Xidməti rəisinin birinci müavini general-mayor Zaur Abdullayev, Gənclər və İdman Nazirliyinin sektor müdiri Əli Məmmədov, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin şöbə müdirinin müavini Samir Murquzov, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvi Emin Həsənli iştirak ediblər.
Tədbirdə çıxış edən Xidmət rəisinin birinci müavini, general-mayor Zaur Abdullayev Azərbaycan Xalq Cümhuriyyətinin xalqımızın tarixində şanlı səhifələrdən olduğunu bildirib. Qeyd edib ki, Cümhuriyyətin mövcud olduğu 23 aylıq qısa dövr mühüm nailiyyətlərlə zəngindir. Cümhuriyyətin Nazirlər Şurasının 1918-ci il 26 iyun tarixli qərarı ilə Əlahiddə Azərbaycan Korpusunun yaradılması ordu quruculuğu prosesinin başlanğıcı oldu. Səməd bəy Mehmandarov, Əliağa Şıxlınski kimi hərbçilərin gərgin fəaliyyəti nəticəsində qısa müddətdə nizami ordu formalaşdırıldı. Cümhuriyyətin Silahlı Qüvvələri həmin dövrdə Dağlıq Qarabağda aparılan hərbi əməliyyatlarda düşməni ağır məğlubiyyətə uğradaraq ölkənin ərazi bütövlüyünün müdafiəsini təmin etdi. Sovet Rusiyasının Azərbaycanı işğalından sonra Milli Ordunun ləğv edilməsinə baxmayaraq, xalqımız hərbi ənənələri qoruyub saxlaya bildi.
Z.Abdullayev qeyd edib ki, milli hərbçi kadrların dövlət üçün böyük əhəmiyyət daşıdığını hələ sovet dövründə uzaqgörənliklə diqqətə alan ümummilli lider Heydər Əliyev 1971-ci il iyunun 20-də Cəmşid Naxçıvanski adına ixtisaslaşdırılmış hərbi məktəbi yaratmaqla gənclərimizin bu istiqamətdə təhsil almalarını təmin etdi. Ulu Öndərin ötən əsrin sonlarında siyasi hakimiyyətə qayıdışından sonra milli ordu quruculuğu prosesinin əsası qoyuldu. Qısa müddət ərzində pərakəndə hərbi dəstələrin əvəzinə vahid komandanlıqdan idarə olunan nizami ordu formaşdırıldı. Hazırda müasir hərbi texnika, silah-sursatla təchiz olunmuş milli ordumuz Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi altında ölkəmizin müstəqilliyinin qorunmasını təmin edir.
Gənclər və İdman Nazirliyinin sektor müdiri Əli Məmmədov ölkəmizdə aparılan dövlət siyasətinin müsbət nəticə verdiyini, vətənpərvər, sağlam düşüncəli gənc nəslin formalaşdığını bildirib.
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü Emin Həsənli Silahlı Qüvvələrin yaradılmasının 100 illik yubileyi münasibətilə orta ümumtəhsil məktəblərinin şagirdləri arasında atıcılıq turnirinin keçirilməsinin hərbi tariximizə göstərilən ehtiramın sübutu olmaqla yanaşı, gənc nəslin hərbi sahəyə marağının artırılmasında böyük əhəmiyyət kəsb etdiyini vurğulayıb.
İştirakçılar təhlükəsizlik qaydaları barədə təlimatlandırıldıqdan sonra yarışa start verilib.
Final mərhələsinin yekununda Nizami rayonundakı 220 saylı tam orta məktəbin komandası birinci yeri tutub. İkinci Səbail rayonundakı 239, üçüncü yerə isə Sabunçu rayonundakı 72 saylı tam orta məktəblərin komandaları layiq görülüblər. Nərimanov rayonundakı 82 saylı tam orta məktəbin X sinif şagirdi Gəray Zeynallı “Sərrast atıcı” nominasiyasında qalib olub.
Qaliblərə kubok, medal, diplom və xatirə hədiyyələri təqdim edilib.
Bölmənin digər xəbərləri
