SIR-DƏRYA VİLAYƏTİNDƏ AZƏRBAYCAN MƏDƏNİYYƏT MƏRKƏZİ YARADILMIŞDIR
AZƏRTAC-ın xüsusi müxbiri xəbər verir ki, Özbəkistanın Sır-dərya vilayətində Azərbaycan Mədəniyyət Mərkəzi yaradılmışdır.
Bu münasibətlə keçirilən mərasimdə Daşkənddəki Azərbaycan Mədəniyyət Mərkəzləri Assosiasiyasının sədri Akif Ağatalıbov salona toplaşan soydaşlarımızı təbrik etmiş və demişdir ki, bu yaxınlarda vilayətdə Azərbaycan Mədəniyyət Mərkəzi rəsmi qeydiyyatdan keçmişdir.
Azərbaycan Mədəniyyət Mərkəzinin sədri Pəhah Əzizov çıxışında qeyd etmişdir ki, vilayətdə 4 min nəfərdən artıq azərbaycanlı yaşayır. Onların demək olar ki, hamısı repressiya qurbanlarının övladları və nəvə-nəticələridir. Soydaşlarımız daha çox vilayətin Sır-Dərya, Baxt, Gülüstan, Yanqiyer və digər şəhərlərində, həmçinin kəndlərdə yaşayırlar. Yalnız Məlik sovxozunda yaşayan azərbaycanlıların sayı min nəfərə yaxındır. Soydaşlarımız adət-ənənələrimizi qoruyub saxlamışlar. Toy, yas mərasimlərimiz Vətəndəkindən fərqlənmir. Demək olar ki, onların əksəriyyəti evlərində peyk antenaları vasitəsilə Azərbaycanın televiziya kanallarına baxırlar.
Sonra “Azəri qızları” uşaq rəqs ansamblının üzvləri milli rəqslərimizi, yerli “Təbriz” ansamblının solisti Komuna Əliyeva xalq mahnıları və təsniflərimizi ifa etmişlər.
Bölmənin digər xəbərləri
